Grenelli qeverisë Kurti: Presim që taksa të hiqet menjëherë

Emisari special i presidentit të SHBA-së Richard Grenell, i ka bërë thirrje qeverisë “Kurti”, që t’i heqë menjëherë taksat për produktet serbe.

“Ne presim që tarifat të hiqen menjëherë”, ka thënë Grenell në një deklaratë dërguar AP-së.

Grenelli, i cili është edhe ambasador amerikan në Gjermani, tha se SHBA-ja “ua bëri të qartë udhëheqësve të partive në Kosovë se heqja e taksës ishte në interesin më të mirë të Kosovës dhe ekonomisë së saj, si edhe dëshirën e saj për të krijuar vende të reja pune”. 

AP-ja kujton se Grenelli muajin e kaluar ndërmjetësoi një marrëveshje për rinovimin e trafikut hekurudhor dhe ajror ndërmjet Beogradit dhe Prishtinës.

“Ne po bëjmë përparim historik. Do të ketë lajme të reja menjëherë pasi të dy palët duan të ecin përpara. Këto hapa do të kontribuojnë në një jetë më të mirë për njerëzit e rajonit,” tha Grenell. Me shumicë votash, Parlamenti i Kosovës dje votoi Qeverinë e përbashkët të Lëvizjes Vetëvendosje dhe Lidhjes Demokratike të Kosovës, të udhëhequr nga Albin Kurti.