Haga ia kufizon vizitat Thaçit, reagon Behrami: Shkelje e të drejtave të njeriut

Deputeti i Partisë Demokratike të Kosovës Artan Behrami, ka reaguar ashpër ndaj vendimit të fundit të Hagës, për t’ia kufizuar vizitat ish-presidentit Hashim Thaçi.

Behrami e cilësoi atë si një shkelje të rëndë të të drejtave të njeriut.

Ai tha se vendimi në fjalë është krejtësisht jashtë kontekstit kohor”dhe “pjesë e një skenari të qëllimshëm të gjykatës për të krijuar drama dhe spektakle”.

“Është shumë e dhimbshme të shihet se si gjykata aprovon të gjitha çmenduritë e prokurorisë për izolimin total të presidentit Thaçi”, theksoi ai.

Deputeti i PDK-së, e ka akuzuar gjykatën se po përpiqet ta shkëpusë presidentin Thaçi nga populli i tij, duke shtuar me ironi:

“U ka mbetur vetëm ta dërgoni në Hanë për ta izoluar krejtësisht, se izolimi që po ia bëjnë në Hagë po u duket pak”, deklaroi ai.

Derisa, në përfundim të reagimit të tij, Behrami dërgoi një mesazh të qartë:

“Kot e keni. Asnjëherë nuk do të mund ta shkëpusni nga populli”.

Vendimi i Dhomave të Specializuara në Hagë, ka nxitur reagime të ashpra.