Haradinaj: I qëndroj pas marrëveshjes me PSD, Rikallo gati në dorëheqje

Kryeministri i Kosovës, Ramush Haradinaj, pas mbledhjes së Qeverisë është pyetur nëse do ta shkarkojë ministrin e Bujqësisë, Nenad Rikallo, e që është kërkesë e Partisë Socialdemokrate në këmbim të votës pro miratimit të buxhetit, ka thënë se do t’i qëndroj pas marrëveshjes që kanë me PSD-në.

“Nëse shkarkohet Rikallo nuk është që unë po i bëjë një vlerësim të punës, ai është gati në dorëheqje. Me Listën Serbe nuk kam komunikuar, me PSD-në kemi folur për përkrahje të buxhetit. Ne jemi tash në bisedime dhe unë jam me PSD-në. Unë kam problem edhe për kuorum për mbledhje të qeverisë sepse gjithmonë 3 ministra janë mangët”, ka thënë Haradinaj.

Në këtë konferencë Haradinaj ka folur edhe për afatin e liberalizimit të vizave. Tha se Presidenti Hashim Thaçi ka pasur të drejtë kur ka deklaruar se muaji qershor do të jetë mundësi për  liberalizimit të vizave.

“Sa i përket liberalizimit, presidenti ka të drejt, qershori është opsion real, por jemi marr vesh mos me fol shumë. Unë pres edhe më herët të ndodh, pasi shumë gjëra kanë ndryshuar pas qëndrimit të Berlinit”, ka thënë Haradinaj.