18:34 / E Martë, 14 Janar 2020

Haradinaj për masakrën e Reçakut: Nuk kishin faj tjetër, ata jetonin në trojet e tyre

Kryeministri në detyrë, Ramush Haradinaj, ka rikujtuar masakrën e Reçakut që ka ndodhur më 15 janar 1999, shkruan IndeksOnline.

Ai ka thënë se me këtë datë  “Armiku nuk i kurseu. As pleqtë, as gratë e as fëmijët”.

“Le të mbetet ky krim gjithmonë në kujtesën e shqiptarëve, në ndërgjegjien e atyre që e planifikuan dhe kryen dhe në ndërgjegjien e atyre që ndanë trojet tona para një shekulli”, ka shkruar ai.

Postimi i plotë:

Reçaku me 15 janar 1999, u vesh kuq e zi, me flamujt që mbulonin trupat e më të dashurve.

Armiku nuk i kurseu. As pleqtë, as gratë e as fëmijët.

Ato motra e vëllezër tonë, u vranë vetëm se ishin shqiptarë.

Nuk kishin faj tjetër. Ata jetonin në trojet e tyre, në shtëpitë e tyre.

Le të mbetet ky krim gjithmonë në kujtesën e shqiptarëve, në ndërgjegjien e atyre që e planifikuan dhe kryen dhe në ndërgjegjien e atyre që ndanë trojet tona para një shekulli.

Urojmë që gjenocidi i ushtruar në Kosovë, të mos i ndodh asnjë populli.

Lavdi Dëshmorëve e Martirëve të Lirisë!

RH

Mos i humb