Haradinaj pritje lamtumirëse për ambasadorin O’Connell: Faleminderit mik i Kosovës!

Kryeministri në largim, Ramush Haradinaj, përmes një postimi të bërë në llogarinë Facebook ka treguar se sot zyra që drejton ai ka organizuar një pritje lamtumirëse për Ambasadorin e Mbretërisë së Bashkuar në Kosovë, Ruari O’Connell.

Haradinaj tregon se ka falenderuar atë për shërbimin nëntë vjeçar në vendin tonë dhe pozicionin konsistent të Britanisë së Madhe për çështje të rëndësishme të Kosovës, veçmas ruajtjen e integritetit territorial dhe përkrahjen për transormimin e FSK-së.

Ky është postimi i plotë i Haradinaj:

Sot në pritjen lamtumirëse të organizuar nga Zyra e Kryeministrit, për ta nderuar angazhimin e Ambasadorit të Mbretërisë së Bashkuar në Kosovë, Ruari O’Connell, theksova se partneriteti me vendin mik, Mbretërinë e Bashkuar, ka qenë determinues për shumë etapa të shtetndërtimit të Republikës së Kosovës.

Ambasadorin O’Connell e falënderova për shërbimin nëntë vjeçar në vend, ndër të tjera edhe për pozicionin konsistent të Britanisë së Madhe për ruajtjen e integritetit territorial të vendit, përkrahjen e madhe për transformimin e FSK-së dhe forcimin e qeverisjes së mirë përmes projektit të rekrutimit të pozitave të larta drejtuese të shërbimit civil. Faleminderit dhe suksese në rrugën e mëtejme diplomatike, mik i Kosovës, Ruari O Connell.