Haradinaj: Zgjedhjet janë zgjidhja e vetme për vendin

Deputeti i AAK-së, Daut Haradinaj, ka kërkuar mbajtjen e zgjedhjeve të parakohshme, duke thënë se përbërja aktuale e Kuvendit nuk i sjell asgjë të mirë vendit.

Ai tutje ka shtuar se ”Dimal Basha nuk është në gjendje të mbikëqyrë institucionin – ai nuk është në gjendje të mbikëqyrë as veten”.

“Zgjedhjet e reja janë zgjidhja e vetme për këtë situatë. Edhe nëse e krijojmë funksionalitetin e Kuvendit, ky Parlament nuk ka për t’i dhënë asgjë të mirë Kosovës. Dimal Basha nuk është në gjendje të mbikëqyrë institucionin – ai nuk është në gjendje të mbikëqyrë as veten. Po të isha në vendin e tij, do të jepja dorëheqje, për të mos bërë hajgare me Kosovën. Por ai e di më mirë”, tha Haradinaj në rtv21.

Ai ka kritikuar kryeministrin në detyrë Albin Kurtin për qëndrimin e tij të pandryshuar ndaj Shteteve të Bashkuara të Amerikës.

Sipas Haradinajt, Kurti edhe sot vazhdon të mbajë një qëndrim kundër SHBA-ve, njësoj si para se të vinte në pushtet.

“Të vetmin qëndrim që e ka mbajtur deri sot, është ai kundër amerikanëve. Atë që e ka thënë para se të vinte në pushtet, e mban edhe sot. Çdo gjë që na prish me amerikanët, ky është në gjendje ta bëjë”, tha Haradinaj.