Historia kriminale e Radosavljeviq, serbit që SHBA ia ka ndaluar hyrjen për rastin e vëllezërve Bytyçi

Departamenti amerikan i Shtetit ia ka ndaluar hyrjen në SHBA kriminelit serb, Goran Radosavljeviq dhe familjes së tij pasi që kanë qenë të përfshirë në vrasjen e vëllezërve Bytyqi. Autoritetet amerikane kanë paralajmëruar edhe sanksione të tjera ndaj personit në fjalë.

Vëllezërit Bytyçi kanë qenë shtetas amerikanë dhe Uashingtoni ka kërkuar vazhdimisht drejtësi për ta. Vrasja e Ilir, Mehmet dhe Agron Bytyçit, më 1999, ka qenë pikë kyçe për marrëdhëniet SHBA- Serbi, teksa Beogradi tenton të integrohet më shpejtë me vendet Perëndimore.

Indeksonline kishte raportuar më parë detajisht për këtë rast. Goran Radosavljeviç – Guri, i lindur në vitin 1957 në Arangjelovac të Serbisë, ishte në krye të ekspeditave serbe kundër familjes së komandantit legjendar Adem Jashari.

Gradën gjeneral-kolonel, Radosavljeviç, po ashtu e kishte marrë me vendim të veçantë të nënshkruar nga një gjeneral tjetër serb i akuzuar për krime lufte në Kosovë, përkatësisht nga Vllastimir Gjorgjeviç – Rodja.

Ky vendim është i datës 22 shkurt 1998, kur ai emërohet si i deleguar profesionist në Kosovë për të shtypur rezistencën e armatosur.

Ishte pikërisht krimineli Goran Radosavljeviç, ai që kishte udhëhequr ekspeditat serbe kundër familjes Jashari, më 5, 6 dhe 7 mars 1998 në Prekaz, ku ra heroikisht komandanti Adem Jashari dhe u masakruan afër 60 anëtarë të familjes së tij.

Emri i Goran Radosavljeviçit figuron në shumë dokumente sekrete të Serbisë edhe si udhëheqës i masakrës së Reçakut më 15 janar 1998, ku u masakruan afër 50 shqiptarë të paarmatosur, por edhe si udhëheqës i shumë sulmeve në Rrafshin e Dukagjinit.

Ndërsa, me një vendim tjetër, po ashtu nga Vllastimir Gjorgjeviç, që është i datës 30 maj 1999, krimineli Radosavljeviç si kuadër i vlefshëm për autoritetet serbe, ishte urdhëruar të kthehej në Serbi si shef i Njësisë Speciale, që më vonë kjo njësi ishte shndërruar në xhandarmëri.

Autoritetet serbe ia kishin besuar kriminelit Goran Radosavljeviç misionin për ta shtypur kryengritjen e armatosur edhe në Luginën e Preshevës.

Në vitet e pasluftës, Goran Radosavljeviç me dhjetëra herë ishte akuzuar nga amerikanët edhe për vrasjen e vëllezërve Bytyqi, Yllit, Agronit dhe Mehmetit, shqiptaro-amerikanëve që ishin ushtarë të Batalionit “Atlantiku”, të vrarë me duar të lidhura me urdhër direkt të Radosavljeviçit dhe të varrosur më pas në kompleksin e ushtrimeve të Njësisë Speciale në Batajnicë, të quajtur “13 Maji”, së bashku me trupat e rreth 2 mijë shqiptarëve të tjerë të vrarë në Kosovë dhe të varrosur aty për t’i humbur gjurmët.

Megjithatë, çuditërisht akuzat e amerikanëve ndaj kriminelit Radosavljeviç kishin pushuar në vitin 2003, sepse së bashku me 1 mijë trupa të ushtarëve serbë, nën komandën e këtij krimineli, Serbia ishte vendosur përkrah amerikanëve në Afganistan, shkruan Indeksonline.

Prej vitit 2014, krimineli Goran Radosavljeviç ka veshur “petkun” e politikanit, duke u angazhuar në Partinë Progresive (Serpska Napredna Stranka-SNS) të Tomislav Nikoliçit atëherë, kurse tash të Aleksandër Vuqiçit.

Krimineli Goran Radosavljeviç sot është anëtar i Këshillit Qendror të kësaj partie, jeton në Beograd dhe është udhëheqës i një firme private të sigurisë fizike dhe teknike të quajtur “Sektrakon”, si dhe konsulent i një firme tjetër të sigurisë.

Përkundër dëshmive të shumta që ai është përfshirë në vrasjen e tre shtetasve amerikan, dhe krimeve tjera kundër njerëzimit dhe operacioneve të fshehta, Goran “Guri” Radosavljeviq kurrë nuk është ndjekur penalisht. Ai mbetet politikisht i mbrojtur nga presidenti Aleksandar Vuçiç dhe qeveria serbe./Indeksonline/