Hovenier: Kërcënimet ndaj policëve në veri janë të papranueshme

74 policë të rinj të hënën morën detyrën e tyre në veri të vendit, raporton Indeksonline.

Nga këta 74 policë, 45 janë të komunitetit serb, 16 boshnjakë, 8 romë, ashkali e egjiptianë, si dhe 3 turq.

Me të marrë detyrën u raportua se të njëjtit janë kërcënuar disa herë.

E, ambasadori i Shteteve të Bashkuara në Kosovë, Jeffrey Hovenier, thotë se janë të papranueshme kërcënimet dhe frikësimet ndaj individëve që shërbejnë për të mirën e të gjithë qytetarëve të Kosovës.

Duke shpërndarë reagimin e shefit të EULEX-it, Hovenier shtoi se Policia e Koosvës ekziston për t’u shërbyer të gjitha komuniteteve në Kosovë.

“Ndaj plotësisht këto shqetësime. Kërcënimet dhe frikësimet ndaj individëve që shërbejnë për të mirën e të gjithë qytetarëve të Kosovës janë krejtësisht të papranueshme. Siç e kam thënë edhe më parë, Policia e Kosovës ekziston për t’i shërbyer të gjitha komuniteteve në Kosovë dhe përbërja e saj duhet të pasqyrojë diversitetin e Kosovës” ka thënë Hovenier.

“Jam shumë i shqetësuar për raportimet e mediave në lidhje me mesazhet kërcënuese kundër policëve të sapo-dislokuar të Policisë së Kosovës nga komunitetet jo-shumicë. Çdo lloj frikësimi është i papranueshëm dhe theksoj rëndësinë që Policia e Kosovës reflekton dhe përfaqëson tërë popullatën e Kosovës” kishte deklaruar mbrëmë shefi i EULEX-it, Giovanni Pietro Barbano./Indeksonline/