Humbën jetën dy minatorë, arrestohet drejtuesi teknik i minierës në Tropojë

Policia e Tropojës ka vënë në pranga drejtuesin teknik të minierës në Lajthizë të Tropojës, ku një ditë më parë humbën jetën dy minatorë.

Sipas Policisë së Shqipërisë, arrestimi i tij u bë sepse më datë 19.03.2022, për shkak të mosmarrjes së masave për sigurimin teknik nga ana e tij, në galerinë minerare, humbën jetën A.D, 41 vjeç dhe A.Zh, 40 vjeç.

“Arrestohet në flagrancë drejtuesi teknik i subjektit për shfrytëzimin e mineralit të kromit, ku ditën e djeshme, humbën jetën dy punonjës.

Specialistët e Seksionit për Krimet në Komisariatin e Policisë Tropojë arrestuan në flagrancë për veprën penale “Shkelja e rregullave të mbrojtjes në punë”, shtetasin:

A.R., 45 vjeç, banues në Bajram Curri, me detyrë drejtues teknik në subjektin për shfrytëzimin e kromit.

Arrestimi i tij u bë sepse më datë 19.03.2022, në fshatin Lajthizë, për shkak të mosmarrjes së masave për sigurimin teknik nga ana e tij, në galerinë minerare, kanë humbur jetën dy punëtorë, shtetasit A. D., 41 vjeç dhe A. Zh., 40 vjeç’, thuhet në njoftimin e policisë shqiptare.