Ideja e Glauk Konjufcës për shtyerjen e zgjedhjeve, Albert Krasniqi e quan vendim të panevojshëm dhe me prapavijë

Anëtari i Shoqërisë Civile, Albert Krasniqi e ka quajtur të panevojshëm dhe me prapavijë mundësinë e shtyerjes së zgjedhjeve lokale në Kosovë.

Kryetari i Kuvendit të Kosovës, Glauk Konjufca ka thënë mbrëmë në një emision televiziv se po të pyetej ai, zgjedhjet në vend duhet të shtyhen.

Njohësi i kushtetutës, Albert Krasniqi ka thënë se e tëra që duhet të bëhet në këtë situatë është shkurtimi i fushatës zgjedhore.

“LVV paska hedhur në publik idenë e shtyrjes së zgjedhjeve lokale, me pretekstin se mund të përkeqësohet situata me pandeminë. Është mirë kur politikanët tregohen të ndjeshëm ndaj shëndetit të qytetarëve, por këtë ndjeshmëri nuk e kemi parë në zgjedhjet e 14 shkurtit kur ftonin qytetarët të merrnin pjesë në marshe masive të fushatës zgjedhore. Atëherë mund të jenë ndjerë më afër pushtetit.

Sot, kur me gjasë numrat nuk po dalin mirë për zgjedhjet lokale, përnjëherë shqetësohen për shëndetin publik!
Një gjë duhet pasur parasysh, që shtyrja e zgjedhjeve nuk e fsheh paaftësinë, papërgjegjësinë dhe pandjeshmërinë e shpërfaqur nga kjo Qeveri në gjithë situatën me pandeminë.

Përtej kufizimeve ligjore për shtyrje të zgjedhjeve, nuk është as e nevojshme. E tërë çfarë duhet të bëhet është shkurtimi i fushatës zgjedhore në marrëveshje me të gjitha paritë politike. Gjatë kësaj periudhe të shkurtuar të fushatës të mos lejohen tubime publike përmbi numrin e lejuar nga IKSHPK-ja, dhe që secili aktivitet publik i fushatës të monitorohet nga inspektorët për respektimin e masave” shkruan Krasniqi në reagim./Indeksonline/