Incident serioz në skenë: Gresa Gashi merr goditje në kokë gjatë shfaqjes

Mbrëmja e djeshme nuk ka shkuar sipas parashikimeve për aktoren e njohur Gresa Gashi. Gjatë performancës së saj në teatër, një incident i papritur ka bërë që aktorja të lëndohet në sytë e publikut dhe ekipit realizues.

Përmes një reagimi në rrjetet sociale, vetë Gresa ka bërë të ditur se ka pësuar një goditje të fortë në pjesën e pasme të kokës. Ajo ka postuar një foto nga shfaqja, duke shpjeguar situatën që ka shkaktuar jo pak shqetësim.

“Gjatë shfaqjes së sontme ndodhi një incident në skenë dhe pësova një goditje të rëndë mbrapa në kokë,” – ka shkruar aktorja.

Pavarësisht natyrës së lëndimit, Gashi ka qetësuar ndjekësit duke treguar se ndodhet nën kujdesin e bluzave të bardha dhe se gjendja e saj është stabile. Ajo nuk ka lënë pa falënderuar koleget dhe publikun për reagimin e menjëhershëm dhe mbështetjen e dhënë në ato momente delikate.

“Skena kërkon përkushtim, forcë dhe dashuri dhe sot i ndjeva të trijat,” – përfundoi ajo mesazhin e saj.

Megjithatë, kujdesi për shëndetin e saj vazhdon edhe ditën e sotme. Mësohet se Gresa gjatë ditës po u nënshtrohet kontrolleve të detajuara mjekësore. Kjo po bëhet për siguri të plotë dhe për të eliminuar çdo dyshim rreth pasojave që mund të ketë lënë goditja e fortë në kokë.

Të shumta kanë qenë mesazhet e shërimit të shpejtë që aktorja ka marrë orët e fundit nga miqtë dhe dashamirësit e saj.