Interesim i madh i studentëve për Universitetin veror
Ka përfunduar aplikimi i studentëve të interesuar për të marrë pjesë në edicionin e 19 të Universitetit Veror Ndërkombëtar të Prishtinës, i cili tradicionalisht mbahet gjatë muajit korrik.
Drejtoresha e këtij programi, Lumnije Bajrami,
tha për Radio Kosovën se edhe këtë vit interesimi për pjesëmarrje është shumë i
madh, derisa konfirmoi se përgatitjet tashmë kanë filluar.
“Janë bërë të gjitha përgatitjet për fillimin e Universitetit Veror
Ndërkombëtar të Prishtinës, i cili sivjet përmban 17 kurse nga të gjitha fushat
studimore dhe fillon më 8 korrik”, tha ajo.
Drejtoresha e këtij kursi, Lumnije Bajrami, tha se tashmë ka përfunduar edhe
faza e aplikimit online për të gjithë të interesuarit që dëshirojnë të marrin
pjesë në këto programe studimore. Bajrami tha se për një program do të pranohen
më së shumti 25 studentë.
“Çka vlen për t’u cekë se studentët kur aplikojnë kanë tri mundësi aplikimi, të
përcaktohen për zgjedhjen e tyre të parë të dytë, të tretë, pastaj varësisht nga
konkurrenca, sepse disa programe mund të kenë konkurrencë më shumë e disa më
pak, atëherë studentët që nuk pranohen në programin e parë mund të përcaktohen
për kursin e dytë ose të tretë”.
Pas kësaj faze, Bajrami tha se studentët vendorë do t’i nënshtrohen një testi
të gjuhës angleze, kurse ata ndërkombëtarë të sigurojnë dëshmi për një gjë të
tillë.
Në UVP, edhe profesorët pjesëmarrës janë nga vende të ndryshme të botës, të
cilët do të ligjërojnë krahas profesorëve vendorë.
“Sa i përket profesorëve ndërkombëtarë të cilët marrin pjesë këtë herë, kemi
profesorë nga SHBA-ja, Gjermania, Japonia, India, Pakistani. Pra, pak a shumë
është një laramani e vendeve të cilat kanë aplikuar, secili kurs ka një
profesor vendor dhe një ndërkombëtar. Përveç kurseve, më vonë do të përzgjedhim
edhe vork-shopet të cilat do të kenë mundësi t’i përzgjedhin studentët”.
Universiteti Veror Ndërkombëtar mbahet nga 8 deri më 19 korrik, derisa përveç
kurseve gjatë kësaj kohe organizohen edhe dy ekskursione në vende të ndryshme
të Kosovës, koncerte, shfaqje e vizita.
Studentët vendorë pjesëmarrjen në UVP e kanë falas, kurse ata ndërkombëtarë
paguajnë 100 euro për akomodim, ushqim dhe ndjekje të kursit.