Interesimi nga Liverpuli, Newcastle i jep ultimatum Alexander Isak të vendos për të ardhmen

Klubi nga Anfield tashmë ka pasur një ofertë të refuzuar për sulmuesin këtë verë.

Newcastle United raportohet se i ka dhënë një ultimatum final sulmuesit të pakënaqur Alexander Isak, vetëm disa orë pasi Liverpool-i, që interesohet për të, humbi Community Shield.

Isak, i cili ka edhe tre vite kontratë me St James’ Park, ka shprehur dëshirën për t’u larguar pas sezonit më të mirë me fanellën e Magpies – ku shënoi 27 gola në 42 paraqitje në të gjitha garat.

Ai ishte pjesë e skuadrës që mundi Liverpool-in në finalen e Carabao Cup sezonin e kaluar dhe ndihmoi klubin të përfundonte në vendin e pestë në Premier League, duke siguruar pjesëmarrjen në Champions League këtë sezon.

Isak iu bashkua Newcastle-it në vitin 2022 për një shifër rekord prej 63 milionë £ nga Real Sociedad dhe ka shënuar 62 gola në 109 ndeshje gjatë tre sezoneve të fundit.

Megjithatë, sulmuesi suedez nuk mori pjesë në turneun parasezonal të Newcastle-it në Azi, pasi shprehu dëshirën për një aventurë të re.

Kampionët e Premier League, Liverpool, janë të etur ta sjellin në Anfield dhe raportohet se kanë pasur një ofertë prej 110 milionë £ të refuzuar nga Newcastle në fillim të gushtit.

Liverpool ka pasur një merkato shumë aktive këtë verë në prag të sezonit të dytë nën drejtimin e Arne Slot.

Mbi 250 milionë £ janë shpenzuar për transferimin e dyshes së Bayer Leverkusen, Florian Wirtz dhe Jeremie Frimpong, Milos Kerkez nga Bournemouth, Giorgi Mamardashvili nga Valencia dhe Hugo Ekitike nga Eintracht Frankfurt.

Ndërkohë, Trent Alexander-Arnold, Jarell Quansah, Luis Diaz, Tyler Morton, Darwin Nunez dhe Caoimhin Kelleher janë larguar nga klubi.

Liverpool e nisi sezonin me një humbje ndaj Crystal Palace në Community Shield të dielën, duke e humbur trofeun pas penalltive në Wembley.

Ekitike i dha avantazhin Liverpool-it në Wembley, përpara se Jean-Philippe Mateta të barazonte me penallti. Frimpong riktheu epërsinë për “The Reds”, por Ismaila Sarr shënoi golin e dytë për Palace në pjesën e dytë. Ndeshja përfundoi 2-2 dhe u vendos nga penalltitë.

Palace fitoi 3-2 nga pika e bardhë, pasi portieri Dean Henderson priti goditjet e Harvey Elliott dhe Alexis Mac Allister, ndërsa Mo Salah gjuajti mbi traversë.

A do të bëjë Liverpool një ofertë të re për Alexander Isak?

Liverpool ende nuk ka bërë një ofertë të përmirësuar për Isak, i cili po stërvitet i ndarë nga pjesa tjetër e skuadrës së Newcastle-it.

Sipas Newcastle Chronicle, Magpies i kanë bërë të qartë lojtarit se një ofertë e rritur duhet të vijë nëse do të shesin yllin e tyre.

“Është përmendur shifra prej 150 milionë £, por burime të tjera nga rrethi i agjentëve sugjerojnë se 130 milionë £ plus bonuse mund të sjellin një marrëveshje,” thuhet në raport.

Isak është informuar se nëse nuk ka një “ofertë serioze” për të, atëherë nuk do të ketë transferim.

Deri atëherë, atij i është dhënë mundësia të stërvitet para ndeshjes hapëse të Newcastle-it kundër Aston Villa-s të shtunën.

Ndërkohë, Daily Mail raporton se Liverpool po planifikon të kthehet me një ofertë të dytë për Isak, por vetëm pasi Newcastle të ketë siguruar një zëvendësues për sulmuesin.