Intervistë ekskluzive/ Këshilltarja e BE-së komenton tensionet në veri: Vuçiq po cenon sovranitetin e Kosovës
Këshilltarja e Bashkimit Evropian Kati Schneeberger thotë se zhvillimet e fundit në veri të vendit janë alarmante.
Në një intervistë ekskluzive për Indeksonline, Schneeberger deklaron se asaj i duken të rrezikshme reagimet e BE-së dhe ShBA-së në “mbrojtje” të Serbisë.
“Duket se nuk kanë mësuar asgjë. Siç e kemi përjetuar me dhimbje situatën në Ukrainë, një politikë qetësimi nuk sjell një zgjidhje paqësore, por më tepër të kundërtën. Konflikti shtyhet dhe bëhet gjithnjë e më i madh derisa të përfundojë në luftë. Ne duhet ta shmangim atë me çdo kusht. Askush nuk e dëshiron luftën e ardhshme, as në Kosovë, as në Evropë. Kështu që unë nuk e kuptoj se si mund të jenë kaq të pamatur dhe të bëjnë përsëri të njëjtat gabime siç bënë me Putinin në 2008 dhe 2014” tha mes të tjerash ajo.
Këshilltarja e BE-së thotë se duhet të punohet intensivisht në dialog, por jo duke i vënë frenat kryeministrit Kurti, që po punon në përmirësim të demokracisë dhe sundim të ligjit, duke luftuar krimin dhe korrupsionin.
Ajo madje thotë se një qasje e tillë, duke e ndëshkuar Kosovën, është plotësisht e gabuar.
“Ndërmjetësuesit nga ana e BE-së dhe SHBA-së duken të fiksuar për të kënaqur Vuçiqin. E lanë të ikë me çdo sulm ndaj një shteti të huaj, sovran, duke fajësuar viktimën. Vetëm kur SHBA-ja dhe BE-ja të zëvendësojnë ata njerëz që tregojnë paturpësisht anshmërinë e tyre në favor të Serbisë, dialogu do të ketë shanse për sukses. Për këtë, ndërmjetësit duhet të jenë persona të paanshëm, të cilët janë në gjendje të njohin situatën dhe të vendosin kufij të qartë kur dëmtohet demokracia dhe kur përdoren hile të pista për të sabotuar procesin” shtoi Schneeberger.
Tutje, këshilltarja e BE-së ka komentuar edhe kidnapimin e tre policëve kosovarë në veri të vendit.
Për Indeksonline ajo ka deklaruar se është skandaloze që së pari atij akti t’i referohet si “arrestim” dhe jo “kidnapim”.
“Është skandaloze që autoritetet perëndimore kanë miratuar formulimin e Serbisë dhe kanë folur për policët e “arrestuar”. Policët kosovarë janë dërguar në një vend tjetër kundër dëshirës së tyre, ku vazhdojnë të mbahen të ndaluar. Kjo quhet “kidnapim”. Vuçiq po cenon sovranitetin e Kosovës dhe të drejtat e njeriut. Ka pasur thirrje për lirim të menjëhershëm, por asnjë dënim apo ndëshkim për Serbinë. Kjo nuk mjafton, kjo që Vuçiq po bën këtu është e papranueshme” tha ajo.
Schneeberger thotë se është e befasuar se si po bëhen dallime edhe në marrjen e masave ndaj dy palëve.
“Është absurde se si po reagojnë SHBA dhe BE ndaj ngjarjeve të ndryshme. Nuk është racionale dhe është jashtëzakonisht e njëanshme në favor të Serbisë. Kosova po dënohet për mbrojtjen e institucioneve të saj dhe zbatimin e demokracisë, ndërsa nuk ka dënime për Serbinë, e cila ka shkaktuar sulme të dhunshme ndaj ushtarëve të KFOR-it, gazetarëve dhe Policisë së Kosovës. Kosova po merr dënime krejtësisht të ekzagjeruara për të bërë atë që pritet nga një shtet demokratik në rrugën e anëtarësimit në BE. Serbia as që kritikohet për prishjen e qëllimshme dhe të dhunshme të këtyre proceseve. Diçka nuk është plotësisht e gabuar këtu. Kjo duhet të ndalet menjëherë.”
Zgjidhjen e tërë kësaj situate ajo e sheh me zëvendësim të personave përgjegjës nga BE që janë të angazhuar me dialogun Kosovë-Serbi.
Schneeberger thotë se as Josep Borrell e as Miroslav Lajçak nuk janë të paanshëm duke i cilësuar si njerëz të gabuar në zgjidhjen e konfliktit.
Tutje ajo thotë se duhen vendosur qartë kufinjtë për Vuçiqin, të forcohet demokracia dhe jo autokracia serbe.
“Ne duhet të përqendrohemi sërish te paqja dhe të kuptojmë se cilat mjete janë të përshtatshme për ta ruajtur atë dhe cilat jo” përfundoi Schneeberger në intervistën ekskluzive të saj për Indeksonline./Indeksonline/
