Ish-lojtari i Man Utd mund të përballet me deri në dy vjet burg, një vit pasi u lirua nga klubi

Ish-mbrojtësi i majtë i Manchester United, Brandon Williams, mund të përballet me deri në dy vjet burg pasi ka pranuar akuzën për drejtim të rrezikshëm të automjetit.

Williams, 24 vjeç, u pa duke vozitur me një shpejtësi deri në 159 km/h në një Audi A3 pranë Handforth, Cheshire, më 20 gusht 2023, sipas Shërbimit të Prokurorisë, me informacion të transmetuar nga BBC News.

Ai u trajtua në spital për lëndime para se të dërgohej në qendrën e paraburgimit në Middlewich. Futbollisti më vonë pranoi fajësinë për drejtim të rrezikshëm të automjetit dhe për vozitje pa sigurim të palës së tretë, për çka dënimi maksimal është dy vjet burgim.

“Dëshmitarët thanë se Williams vazhdimisht po rritte shpejtësinë dhe pastaj frenonte papritur, ishte e qartë që nuk kishte kontroll mbi automjetin,” tha Andrew Madden, prokuror i lartë i Shërbimit të Prokurorisë së Kurorës.

“Mënyra e tij e vozitjes ishte e çrregullt dhe shpejtësia ishte tejet e lartë. Në fund, Williams e humbi kontrollin dhe u përplas.” 24-vjeçari do të dënohet më 9 maj në Gjykatën e Kurorës në Chester.