Ish-shefi i Mossad rrëfen si i përdorën iranianët për të sabotuar programin bërthamor të Iranit

Kreu në largim i agjencisë së spiunimit izraelit, Mossad ka dhënë një intervistë të gjatë rreth operacioneve që kjo agjenci ka kryer kundër Iranit.

Yossi Cohen dha detaje rreth vjedhjes së arkivit bërthamor të Iranit. Bastisja e magazinës në vitin 2018 transportoi dhjetëra-mijëra dokumente nga Irani në Izrael, një pjesë e të cilave u përdorën edhe nga Benjamin Netanjahu për t’i treguar botës se Teherani nuk kishte hequr dorë nga ndërtimi i bombës bërthamore.

Cohen gjithashtu la të kuptohet për përfshirjen e Izraelit në shkatërrimin e centralit bërthamor të Iranit në Natanz dhe vrasjen e një shkencëtari bërthamor.

Cohen doli në pension si kreu i Mossad javën e kaluar. Ai foli për një televizion izraelit.

Kryeministri izraelit, Benjamin Netanyahu emëroi Yosi Cohen si shef të Mossad në fund të vitit 2015. Ai u bashkua me agjencinë në 1982 pasi studioi në universitet në Londër dhe i tha programit se kishte pasur “qindra” pasaporta gjatë gjithë karrierës së tij.

Momentet më zbuluese në intervistë kishin të bënin me vjedhjen e arkivit bërthamor të Iranit. Netanyahu zbuloi dosjet e vjedhura në një konferencë shtypi në 2018, për të cilën ai tha se provoi që Irani dikur u përpoq fshehtas të bënte armë bërthamore dhe se kishte ruajtur fshehtas këtë projekt – një pretendim që Irani e mohoi.

Në 2018, Kryeministri izraelit Benjamin Netanyahu zbuloi atë që ai pretendonte të ishte arkivi sekret atomik i Iranit.

Cohen tha në intervistë se u deshën dy vjet për të planifikuar operacionin. Në total 20 agjentë të Mossad ishin të përfshirë në terren – askush prej të cilëve nuk ishte shtetas izraelitë, i tha ai gazetarit Ilan Dayan.

Shefi i spiunimit izraelit vëzhgoi operacionin nga një qendër komande në Tel Aviv. Agjentët hynë në një depo dhe u desh të thyejnë më shumë se 30 kasaforta, tha ai. Ndërsa imazhet e provave u shfaqën në ekran, “kishte një emocion të jashtëzakonshëm për të gjithë ne”, tha ai, siç citohet nga The Times of Israel.

Të gjithë operativët i mbijetuan bastisjes dhe janë mirë, shtoi ai, megjithëse disa duhej të nxirreshin nga Irani.

Ndërsa nuk është e pazakontë që ish-krerët e Mossad-it të japin intervista ose të bëjnë të njohura për shtyp pikëpamjet e tyre mbi çështje të caktuara, komentet e Yossi Cohen janë të jashtëzakonshme për nivelin e detajeve që ato zbulojnë.

Në të vërtetë Times of Israel në internet e quan intervistën “mahnitëse dhe zbuluese”. Si diçka nga faqet e një triller, Cohen përshkruan se si agjentët thyen kasafortat para se të ngrinin ton të dokumenteve bërthamore iraniane dhe t’i nxirrnin ata jashtë vendit në momentin kur ishin ndjekur.

Sipas mediave izraelite, rrëfimi i Cohen nënkupton se në këtë operacion madhor, Mossad ka përdorur kryesisht si rekrutë shtetas iranianë.