Jepet shpjegimi se pse është asfaltuar rruga me kalldrëm në Trepçë

Pas raportimeve se rruga me kalldrëme në Trepçë po asfaltohet ka reaguar Ministria e Infrastrukturës dhe Transportit.

Në reagim thuhet se vendimi për asfaltim është marrë pas kërkesave të banorëve se rruga është tërësisht e degraduar.

MIT ka bërë të ditur gjithashtu se asfaltimi mbi kalldrëmin ekzekutues është bërë edhe para luftës.

Më poshtë mund të gjeni të plotë reagimin e Ministrisë.

Ministria e Infrastrukturës dhe Transportit ka pranuar disa pyetje rreth asfaltimit të rrugës me kalldrëm në Trepçë, prandaj në vazhdim ju informojmë për rrjedhojën e këtij veprimi.

Në bazë të planifikimit vjetor të menaxherit rajonal nga drejtoria e menaxhimit të rrugëve, planifikim ky në të cilin përfshihen të gjitha nevojat dhe kërkesat e banorëve, është paraparë asfaltimi i 263 metrave të mbetur të rrugës rajonale 22 kilometërshe R129, Mitrovicë – Bajgorë – Bicel.

Ky vendim është marrë nga menaxheri kompetent, pas kërkesës së banorëve dhe konstatimeve se rruga është tërësisht e degraduar. Në të njëjtën kohë, asfaltimi është vazhduar edhe për këtë pjesë, me qëllim të evitimit të pengesave në lëvizjen e lirë dhe rritjes së sigurisë në trafikun rrugor.

Ju njoftojmë, sipas mbikëqyrësve të rajonit të Mitrovicës, se e tërë pjesa tjetër e rrugës, deri tek ky 263 metërsh, është asfaltuar qysh para luftës, mbi kalldrëmin ekzistente.