Kadastra shqiptare, del me deklaratë skandaloze për kancerin e gjirit
Siç e dini, tetori përkon me muajin e ndërgjegjësimit për zbulimin e hershëm të kancerit të gjirit. Kështu, çdo institucion publik apo shtetëror ka kontribuar në një nismë si kjo, për t’u bërë thirrje grave dhe vajzave të mos lënë pas dore kontrollet rutinë për t’i shpëtuar që herët kësaj sëmundjeje.
Në përpjekje për të bërë këtë, Agjensia Shtetërore e Kadastrës (ASHK, institucioni që merret me regjistrimin e pasurive të paluajtshme), ka bërë një thirrje (deklaratë) përmes një statusi në Facebook, që më shumë se do t’i ndërgjegjësonte gratë dhe vajzat do t’i shokonte ato, njoftojnë mediat shqiptare, transmeton Indeksonline.
Përveç mënyrës që kanë zgjedhur për të ndërgjegjësuar gratë, ajo çfarë shkruan Kadastra Shqiptare është sa e turpshme ashtu dhe qesharake.
Që kur kanceri i gjirit ka të bëjë me dinjitetin njerëzor apo “bukurinë trupore dhe sharmin e femrës”? Çfarë kanë dashur të thonë përmes kësaj fjalie? Që një grua apo vajzë e cila është përballuar me një sëmundje të tillë nuk është më e bukur apo sharmante? Që nuk ka më dinjitet? Me siguri, ata që e kanë shkruar këtë status nuk kanë arritur as vetë të kuptojmë çfarë shkruajnë në të.
Bota, prej dekadash po lufton që njerëzit në përgjithësi dhe gratë në veçanti ta duan dhe ta pranojnë trupin e tyre me çfarëdo lloj peshe, forme, me njërin gjoks, me të dy apo me asnjërin e ndërkohë, e Kadastra jonë shkruan se ‘kanceri i gjirit është çështje sharmi femëror”. Me qindra artikuj publikohen çdo ditë, nga gra që kanë kaluar një kapitull të gjatë me kancerin e gjirit (dhe jo vetëm), për të frymëzuar gjithë të tjerat e për t’i thënë se në fund të ditës, janë njësoj të bukura. Me rëndësi është të jenë të shëndetshme dhe të ndihen të tilla.
Statusi, më lartë, jo vetëm që nuk ka lidhje me ndërgjegjësimin, por është ofendues për të gjitha gratë dhe në veçanti për ato që pas një ose disa ndërhyrjesh për t’i shpëtuar kësaj sëmundjeje, mund të kenë hequr njërin prej gjinjve apo të dy./Indeksonline/
