18:24 / E Hënë, 30 Nëntor 2020 / Blerina Racaj

Kanë filluar provat për shfaqjen e radhës të Teatrit të Qytetit – Gjilan

Drama / komedia e autorit “cinik” Jeton Neziraj „Kosovo for dummies“ e me regji të Blerta Rrustemi Neziraj do të jetë shfaqja më e re e teatrit tonë.

Komedia „Kosovo for dummies“ rrëfen historinë e Antigonës nga Kosova, e cila, për të fituar lejeqëndrimin në Zvicër, duhet të dëshmoj që nuk është një rinoqeront. Megjithatë, t’u themi që në fillim: në shfaqje nuk do të derdhet as një pikë gjaku, sado që ngjarjet që ajo i shtjellon janë mjaft dramatike. Madje-madje, nuk do të eksplodojë as edhe ndonjë bombë, pavarësisht se njëri nga personazhet e shfaqjes është mysliman dhe kjo mund të paragjykohet nga dikush. Drama ka fund të lumtur.

„Me satirë tregohet raporti ndaj emigrantëve, përmes një loje të pazakontë, gati si në ëndërr, por me plot forcë poetike“. (Michael Feller, Berner Zeitung)”

“Autori Jeton Neziraj then realitetin brutal dhe ndërton në skenë një realitet të ri. Me këtë krijon një drejtësi që të ngushëllon“. (Lena Rittmeyer, Der kleine Bund)

Në shfaqje do të luajnë: Aurita Agushi, Tringa Hasani, Avni Shkodra, Kushtrim Qerimi, Gani Rrahmani, Safete Mustafa dhe Ernest Zymberi.