Këmbësori goditet në “Kodrën e Trimave” në Prishtinë, pamje të frikshme nga vendi i ngjarjes

Një aksident i rëndë trafiku ndodhi pasditën e sotme në Kodrën e Trimave në Prishtinë.

Tri vetura, dy të parkuara dhe një në lëvizje, janë përfshirë në një përplasje të madhe, shkruan IndeksOnline.

Më së shumti nga ky aksident pësoi një këmbësor, i cili u lëndua rëndë.

Dyshohet se vetura që shkaktoi aksidentin e ka goditur këmbësorin aq fort, sa i njëjti ka përfunduar në mes të veturave të parkuara, që më pas janë goditur po ashtu.

Ende nuk dihet asgjë mbi gjendjen shëndetësore të këmbësorit.

IndeksOnline ka kontaktuar edhe Policinë e Kosovës për të marrë informacione mbi rastin.

”Sot rreth orës 17:00 kemi pranuar informatën për një aksident trafiku me lëndime në rrugën “Fahri Fazliu” në Prishtinë. Në aksident janë përfshirë tri vetura dhe një këmbësor. Si pasojë lëndime ka pësuar një person, i cili pranuar tretman mjekësor” deklaroi zëdhënësi i policisë, Enis Pllana.

Më poshtë pamje nga Kodra e Trimave, ku qytetarët po lëvizin me duar veturat e tyre, për të nxjerrë viktimën./IndeksOnline/