Këngëtarja e njohur heq dorë nga muzika për shkak të sulmeve mizore ndaj trupit të saj

Nelly Furtado i habiti fansat të premten duke zbuluar se po i jep fund performancave — një vendim që vjen mes një vale komentesh mizore për trupin e saj.

Njoftimi vjen vetëm disa javë pasi këngëtarja e hitit “Promiscuous” i hodhi poshtë me humor thashethemet në internet për pamjen e saj fizike, gjatë performancës në Manchester Pride, ku ajo përqafoi me krenari format e saj natyrale.
Por këtë herë, toni i saj ishte shumë më serioz.

Furtado, 45 vjeç, e ndau lajmin në një postim emocionues në Instagram të premten, duke thënë se, ndonëse është pafundësisht mirënjohëse për karrierën e saj — e cila filloi 25 vjet më parë me albumin e suksesshëm debutues Whoa, Nelly! dhe hite si I’m Like a Bird dhe Maneater — ajo tani mendon se ka ardhur koha të “largohet”, për t’u përqendruar në “përpjekje të tjera krijuese dhe personale”.

Ylli fitues i çmimit Grammy, nuk e përmendi drejtpërdrejt reagimin negativ në postimin e saj.

“Faleminderit për udhëtimin”, u tha ajo fansave, duke shtuar se, edhe pse po tërhiqet nga performancat live, ajo “do të vazhdojë gjithmonë të shkruajë muzikë”.

Postimi prekës i Furtados përfshinte një foto të saj në moshën 20 vjeç, përpara shfaqjes së saj të parë profesionale në Lilith Fair, si dhe një klip nga koncerti i saj triumfues në Berlin këtë verë — një moment që ajo e përshkroi si “të kuptuarit më në fund se çfarë do të thotë të marrësh lule”, teksa turma brohoriste emrin e saj.

Duke kujtuar ditët e para të karrierës, ajo rrëfeu se për performancën e saj të parë kishte blerë “një fustan rozë nga një dyqan i quajtur Original në Queen West në Toronto”, së bashku me “këpucë me platformë të shkëlqyeshme për rastin”.

“Ishte kaq kuptimplote dhe unë si artiste u ndjeva kaq e realizuar,” shkroi ajo.

Duke shënuar 25-vjetorin e albumit të saj debutues Whoa, Nelly!, këngëtarja reflektoi mbi rrugëtimin e saj muzikor:
“25 vjet më vonë, muzika ime ka arritur një brez të ri fansash dhe nuk mund të jem më e lumtur për këtë,” deklaroi ajo.

“Kurrë nuk mund ta kisha imagjinuar se do të kishte kaq shumë mënyra të reja për të zbuluar muzikën ‘e vjetër’ në vitin 2025!” shtoi krijuesja e hitit Promiscuous Girl, duke u mahnitur me qëndrueshmërinë e këngëve të saj ndër vite.

Ajo vazhdoi të shprehte mirënjohjen për “kaq shumë njerëz që kanë rizbuluar” muzikën e saj, duke e përshkruar përvojën si “surrealiste dhe të gëzueshme”. Furtado tha se takimet me fansat “nga afër” e kanë bërë “të besojë vërtet në magji”.

“E kam shijuar jashtëzakonisht shumë karrierën time dhe ende më pëlqen të shkruaj muzikë, pasi gjithmonë e kam parë si një hobi që kam pasur fatin ta shndërroj në karrierë,” shpjegoi ajo.

Në mbyllje, Furtado falënderoi “çdo person që ka dëgjuar dhe është prekur nga muzika ime, që ka marrë pjesë në ndonjë nga shfaqjet e mia”, si dhe “të gjithë ata që kanë punuar me përkushtim për të më ndihmuar të realizoj ëndrrat e mia në muzikën pop”. /tch