Koci: Kosova është e bekuar me rezerva të mëdha të linjitit, është koha të veprojmë me guxim dhe vendosmëri

Avokati Arianit Koci ka thënë se Kosova është e bekuar me rezerva të mëdha të linjitit, duke u renditur e treta në Evropë dhe e pesta në botë për këtë lloj qymyri.  Ndërsa ka thënë se është koha që  të veprohet me guxim dhe vendosmëri, duke investuar në teknologji moderne dhe duke përdorur filtra mjedisorë.

Kjo pasuri  sipas tij përbën një mundësi të jashtëzakonshme për zhvillimin ekonomik dhe pavarësinë energjetike të vendit.

“Megjithatë, për shumë vite, kemi qenë viktima të politikave diskriminuese – kryesisht në emer të mbrojtjes së ambientit, që kanë penguar shfrytëzimin e këtyre burimeve jetike.  Është e qartë se Serbia ka interes të madh që Kosova të mbetet ekonomikisht e pazhvilluar, duke e parë këtë si një mundësi për të sfiduar shtetësinë tonë dhe për të ruajtur ndikimin e saj në rajon”, ka thënë Koci.

Postimi i plotë i Kocit:

Kosova është e bekuar me rezerva të mëdha të linjitit, duke u renditur e treta në Evropë dhe e pesta në botë për këtë lloj qymyri.

Kjo pasuri përbën një mundësi të jashtëzakonshme për zhvillimin ekonomik dhe pavarësinë energjetike të vendit.

Megjithatë, për shumë vite, kemi qenë viktima të politikave diskriminuese – kryesisht në emer të mbrojtjes së ambientit, që kanë penguar shfrytëzimin e këtyre burimeve jetike.

Është e qartë se Serbia ka interes të madh që Kosova të mbetet ekonomikisht e pazhvilluar, duke e parë këtë si një mundësi për të sfiduar shtetësinë tonë dhe për të ruajtur ndikimin e saj në rajon.

Ndërkohë, vende të tjera veprojnë me vendosmëri për të siguruar stabilitetin e tyre energjetik:

• Kina nuk e ka ndalur kurrë përdorimin e qymyrit.

• Shtetet e Bashkuara po i rikthehen atij për të garantuar sigurinë energjetike.

• Gjermania dhe Austria kanë rihapur termocentralet me qymyr për të përballuar krizën aktuale energjetike.

• Në rajonin tonë, Serbia, Maqedonia e Veriut dhe Bosnja e Hercegovina mbështeten fuqishëm në linjit për prodhimin e energjisë elektrike.

Është koha që edhe ne të veprojmë me guxim dhe vendosmëri. Duke investuar në teknologji moderne dhe duke përdorur filtra mjedisorë, mund të shfrytëzojmë pasuritë tona natyrore në mënyrë të qëndrueshme, duke mbrojtur ambientin dhe shëndetin e qytetarëve tanë. Kjo do të na mundësojë të ndërtojmë një ekonomi të fortë, të krijojmë vende të reja pune dhe të sigurojmë një të ardhme më të mirë për brezat që vijnë.

Nuk mund të lejojmë që pasuritë tona të mbeten të pashfrytëzuara, ndërsa qytetarët tanë përballen me vështirësi ekonomike.

Një Kosovë e zhvilluar ekonomikisht është një Kosovë e fortë, e pavarur dhe krenare.