Kolumbia bllokon dy avionë ushtarakë që transportonin emigrantë nga SHBA: Nuk janë kriminelë

Presidenti i Kolumbisë, Gustavo Petro njoftoi se ka ndaluar hyrjen e avionëve ushtarakë amerikanë që transportojnë emigrantë të deportuar në hapësirën ajrore të vendit të tij, duke thënë se ai do të pranojë vetëm fluturime që i trajtojnë njerëzit me dinjitet.

Një zyrtar amerikan i tha Reuters se Kolumbia kishte refuzuar hyrjen e dy avionëve ushtarakë që ishin nisur nga Kalifornia dhe mbanin rreth 80 emigrantë secili.

“Një emigrant nuk është kriminel dhe duhet të trajtohet me dinjitetin që i takon një qenieje njerëzore. Kjo është arsyeja pse ne i shtymë avionët ushtarakë amerikanë që po transportonin emigrantë kolumbianë. Unë nuk mund t’i detyroj emigrantët të qëndrojnë në një vend që nuk i do ata, por nëse ai vend i dëbon, kjo duhet të bëhet me dinjitet dhe respekt për ta dhe për vendin tonë“, u shpreh Petro në një postim në X.

“Do t’i presim qytetarët tanë me avionë civilë, pa i trajtuar si kriminelë“, shtoi ai.

Një ditë më parë, edhe Brazili kërkoi një shpjegim nga Uashingtoni për “trajtimin poshtërues”të emigrantëve të parregullt brazilianë që u dëbuan nga Shtetet e Bashkuara dhe mbërritën të premten në Manaus me avion ushtarak. Sipas qeverisë braziliane, në bordin e këtij avioni ndodheshin 88 brazilianë.

Un migrante no es un delincuente y debe ser tratado con la dignidad que un ser humano merece.

Por eso hice devolver los aviones militares estadounidenses que venían con migrantes colombianos.

No puedo hacer que los migrantes queden en un país que no los quiere; pero si ese país… https://t.co/U1MmWrNio1

— Gustavo Petro (@petrogustavo) January 26, 2025