Komisioni i Venecies, do të japë opinion për Projektligjin për tubime publike

Kryeministri i Qeverisë së Kosovës, Avdullah Hoti ka marrë një letër nga presidenti i Komisionit të Venecies për pranueshmërinë e kërkesës për opinion për Projektligjin për tubimet publike. 

Me këtë ligj rregullohet e drejta për tubime publike, e drejta e fjalës së lirë në tubime publike, protesta, manifestime publike, koha dhe mënyra e lajmërimit apo ndalimit të tubimeve publike, si edhe detyrat dhe përgjegjësitë e organizatorëve.

Duke vlerësuar se liria e tubimeve publike është një nga të drejtat themelore të njeriut, sipas konventave ndërkombëtare, por edhe në legjislacionin vendor në fuqi, kryeministri e ka vlerësuar nevojën e opinionit nga Komisioni i Venecies për këtë projektligj.

Zyra e kryeministrit, Ministria e Punëve të Brendshme dhe Policia e Kosovës do të formojnë grup punues për adresimin e të gjitha rekomandimeve të Komisionit të Venecies, me qëllim që Projektligji për tubimet publike të jetë në përputhje me praktikat dhe standardet më të mira ndërkombëtare në këtë fushë.