Konvertimi i patentëshoferëve, serbët: Jetojmë në Kosovë, ta respektojmë ligjin

Një muaj e gjysmë nga hyrja në fuqi e vendimit të Ministrisë së Punëve të Brendshme të Kosovës për  konvertimin e patentëshoferëve serbë në ato të Republikës së Kosovës, procesi ka nisur të marrë hov. Deri tani, në veri të vendit janë dorëzuar rreth 1400 kërkesa për konvertimin e patentëshoferëve, kanë bërë të ditur nga Policia e Kosovës për RTK-në.

Qytetarët e Mitrovicës së Veriut shprehen se shumë prej tyre apo familjarëve të tyre i kanë ndërruar tashmë patentëshoferët serbë me ats të Kosovës.

“Atëherë kam qenë ndër të parët që kam marrë letërnjoftimin e UNMIK-ut dhe pa asnjë problem e kam  konvertuar nga ai serb në atë të Kosovës. Shumica e njerëzve po e ndërrojnë patentëshoferin serb me atë të Kosovës. Çfarë të bëjnë njerëzit, nëse e kanë letërnjoftimin e Kosovës, jetojnë në Kosovë, duhet ta respektojnë ligjin për t’iu shmangur dënimit”, tha një banor i Mitrovicës së Veriut për RTK-në 2.  

E një tjetër qytetar theksoi: “Djali im ndryshoi patentëshoferin, të gjithë po i konvertojnë. E ndërroi që të mos dënohej”.

Zëvendësdrejtori i Policisë së Kosovës për rajonin e veriut, Veton Elshani, tha se deri tani janë dorëzuar rreth 1400 kërkesa për ndërrim të patentëshoferëve: 387 në Mitrovicën e Veriut, 193 në Zveçan, 347 në Leposaviq dhe 198 në Zubin-Potok.

“Në maj të këtij viti ka filluar procesi i aplikimit për konvertim të patentëshoferëve në RKS dhe i gjithë procesi do të jetë i përmbyllur deri më 10 gusht të këtij viti. Deri tashti kemi 1400 aplikime për konvertim të patentëshoferëve dhe procesi po ecën pa asnjë problem. Mendoj se deri në përfundim të afatit do të përmbyllet gjithçka”, theksoi Elshani për RTK-në 2.

Ndërkaq, Milica Andriq – Rakiq nga Iniciativa e Re Sociale tha se procesi i konvertimit të patentëshoferëve në RKS duhej të kishte ndodhur që në vitin 2021, e që do të pasonte me riregjistrimin e automjeteve. 

”Ky veprim  do të duhej t’i paraprinte gjithçkaje. E tërë kriza e shtatorit të vitit 2021 ka ndodhur për shkak të kësaj. Në vend që fillimisht qytetarëve t’u mundësohet konvertimi i dokumenteve, siç ishte rasti nga viti 2007 deri në vitin 2010 në jug  dhe në veri më 2011 dhe 2017, Qeveria e Kosovës vendosi t’i konfiskojë automjetet. Ky do të duhej të ishte hapi i parë. Që në vitin 2021 do të duhej të niste procesi i konvertimit të dokumenteve, e më pas riregjistrimi i automjeteve”, tha ajo.

Afati për ndryshimin e patentëshoferëve skadon më 10 gusht. Pas kësaj date nuk do të jetë më i mundur përdorimi i patentëshoferëve serbë, që janë lëshuar për qytetarët e Kosovës.