Korçë: Shkoi të hapte lokalin, një 45-vjeçar gjendet i masakruar!

Pronari i një lokali në fshatin Mborje të Korçës është gjetur i pajetë mëngjesin e sotëm jashtë ambientit të biznesit të tij. Viktima është shtetasi Flamur Duçi rreth 45 vjeç.

“Më 19.12.2019, rreth orës 07.15, jemi njoftuar se në fshatin Mborje, pranë lokalit të tij është gjetur i pajetë nga bashkëfshatarët, shtetasi F.D., rreth 45 vjeç”, njofton policia.

Dyshohet se 45-vjeçari është vrarë me mjete prerëse mëngjesin e sotëm teksa ka shkuar të hapte lokalin e tij dhe i është bërë pritë duke e masakruar me thikë.

Grupi hetimor ka mbërritur menjëherë në vendngjarje dhe po punon për zbardhjen e ngjarjes.