Kosova do të strehoj 20 gazetarë ukrainas, kaq para u ndanë për shpenzimet e tyre

Kosova është ndër vendet e para në këtë pjesë të Europës që i është bashkuar Perëndimit në vendosjen e sanksioneve kundër Rusisë, pasi Vladimir Putini nisi forcat e tij për ta pushtuar shtetin fqinj, Ukrainën.

Lufta në Ukrainë po përcillet me vëmendje shumë të madhe në Kosovë, me qytetarët që tregojnë dhembshurinë e tyre për zhvillimet atje, zakonisht në rrjetet sociale. Në këtë situatë, Qeveria e Kosovës ka menduar të tregojë në mënyrë edhe më vendimtare pozicionimin e vendit.

Siç raporton agjencia ndërkombëtare e lajmeve, Reuters, Kosova planifikon t’u ofrojë strehim për gjashtë muaj 20 gazetarëve ukrainas.

Qeveria fillimisht do të ndajë 150,000 euro për t’i paguar shpenzimet e tyre të jetesës, pagat dhe zyrat për një periudhë deri në gjashtë muaj, për t’ua mundësuar atyre të punojnë në distancë.