KQZ tregon se çfarë ndodh nëse votohet numri 1 në listën e VV-së
Pas vendimit të Gjykatës Kushtetuese, me të cilin liderit të Lëvizjes Vetëvendosje, Albin Kurtit, u ndalohet kandidimi për deputet në zgjedhjet e 14 shkurtit, dhe përfundimit të afatit për të zëvendësuar numrin 1 të listës, qytetarët hasën në konfuzitet se a do të jetë fletëvotimi i vlefshëm nëse shënjojnë numër 1 të LVV-së.
Zëdhënësi i Komisionit Qendror të Zgjedhjeve, Valmir Elezi, për IndeksOnlinen ka thënë se votat për kandidatët e subjekteve politike, të cilët nuk janë certifikuar nga Komisioni Qendror i Zgjedhjeve për zgjedhjet e parakohshme parlamentare të 14 shkurtit, nuk do të hyjnë në formularët e rezultateve të kandidatëve.
“Ligji për zgjedhjet e përgjithshme, i ndryshuar në vitin 2010, ka qartësuar mënyrën e votimit. Sipas nenit 110, paragrafi 4, votuesi pajiset me një fletëvotim në zgjedhje dhe a). e shënon atë me votën për një subjekt politik, dhe b) mund që po ashtu të shënojë atë me vota për deri në 5 kandidatë nga lista e subjektit politik. Ndërsa, në paragrafin 5 theksohet se “nëse një fletëvotim shënohet për më shumë se 5 kandidatë, atëherë numërohet vetëm vota e hedhur për subjektin politik”. Pra, votuesi duhet të zgjedhë vetëm 1 subjekt politik dhe më së shumti 5 kandidatë nga ai subjekt politik”, ka deklaruar Elezi.
Pas përfundimit të votimit, anëtarët e Këshillit të vendvotimit, të cilët përfaqësojnë subjektet politike, numërojnë fillimisht votat për subjektet politike, duke krijuar dëngje me votat e vlefshme për secilën prej tyre. Pas këtij procesi, Këshilli i vendvotimit numëron pjesën tjetër të fletëvotimit: votat e kandidatëve.
“Këto të dhëna paraqiten në Fletat llogaritëse të kandidatëve (FLLK) për secilin fletëvotim. Në këto fleta paraqiten të dhënat për çdo numër. Pas kësaj, bëhet bartja e totalit të votave për secilin kandidat të certifikuar. Pra, nëse një subjekt politik ka të certifikuar 4 kandidatë dhe në fletëvotim janë shënuar 5 numra, në FLLK evidentohen këto 5 shënime, por ato nuk barten të gjitha në formularët e rezultateve të kandidatëve. Në këta formularë bartën vetëm votat e kandidatëve të certifikuar”, ka thënë Elezi.
Ndryshe, liderit të Lëvizjes Vetëvendosje, Albin Kurtit, i është ndaluar kandidimi për deputet me vendim të Gjykatës Kushtetuese, pasi sipas aktgjykimit të plotë të këtij institucioni u ndalohet të gjithë atyre që janë të dënuar në tre vjetët e fundit me vendim të formës së prerë të kandidojnë për postin e deputetit.
Me të njëjtin arsyetim u rrëzua edhe Qeveria e Hotit, pasi vota e deputetit Etem Arifi u shpall e pavlefshme, për shkak se ishte i dënuar me një vit e tre muaj burgim për mashtrim me subvencionet./IndeksOnline/
