Kreu i Bashkësisë Fetare Islame në Maqedoninë e Veriut: Xhumaja në xhami, vaktet e tjera në shtëpi

Kreu i Bashkësisë Fetare Islame në Republikën e Maqedonisë së Veriut, Reis Ul Ulema Sulejman Efendi Rexhepi në një prononcim ekskluziv për TV Alsat theksoi se Bashkësia Fetare Islame ndjek nga afër situatën me koronavirusin dhe se respekton rekomandimet e Ministrisë së Shëndetësisë.

Ai me këtë raste nënvizoi se namazi i Xhumasë duhet të falet në objekt fetar, në xhami, derisa vaktet e tjera sugjeroi që besimtarët t’i kryejnë në mënyrë individuale në shtëpitë e tyre.

“Në një konkluzion të Ministrisë së Shëndetësisë theksohet, se çdo vend publik ku mund të bashkohen, mund të takohen mbi 1 mijë vetë, aty ekziston mundësia që diçka të përvidhet dhe të përçohet, sa i përket koronavirusit. Nëpër xhamitë tona mund të ketë maksimalisht 100, 200, 300 persona që falin Xhumanë. Sa u përket vakteve të tjera, preferenca jonë është, më tepër duhet besimtarët të t’i kryejnë në shtëpi në mënyrë individuale. E gjithë puna është në namazin e Xhumasë, i cili patjetër e ka të falet në objekt publik dhe i udhëhequr. Dhe ajo që dua ta theksoj me këtë rast, nuk duet askush ta vrasë mendjen se nëpër xhamia eksiton ndonjë mundësi që mund të përhapet virusi atje. Komplet xhamitë masën e dezinfektimit e kanë të përditshme”, u shpreh Sulejman Rexhepi, kryetar i Bashkësisë Fetare Islame të Republikës së Maqedonisë së Veriut.

Megjithatë mbyllja e plotë e xhamive sipas Reisit do të shkaktonte panik tek qytetarët.

“Ne nëse si BFI dalim me qëndrim që t’i mbyllim xhamitë, së pari fetarisht nuk është në rregull, islamikisht nuk është në rregull dhe mua më krijon përshtypje se ne atëherë e kultivojmë çështjen e panikut, a ta kultivosh panikun është me e keqe se virusi korona”, deklaroi Sulejman Rexhepi, kryetar i Bashkësisë Fetare Islame të Republikës së Maqedonisë së Veriut.