Kryeziu i cilëson të palogjikshme koalicionet në balotazh mes partive që armiqësohen në qendër

Drejtori i Institutit Demokratik të Kosovës, Ismet Kryeziu, i ka cilësuar pazare dhe të palogjikshme disa koalicione që po arrihen në prag të raundit të dytë të zgjedhjeve lokale.

“Koalicionet për komuna po bëhen kush me kë po mundet — varësisht prej pazareve. Komunat janë nivel tjetër i qeverisjes, pajtohemi. Por partitë nuk mund ta ndajnë me thikë qeverisjen kombëtare nga ajo lokale. Cila është logjika politike nëse në nivelin kombëtar përçahen, armiqësohen dhe nxisin pothuaj përplasje civile, ndërsa në nivel lokal sillen sikur janë bashkëpunuese “për të mirën e qytetarit”, ka shkruar Kryeziu në Facebook. “Nuk mund t’i lësh qytetarët një vit pa institucione, pa kuvend e pa qeveri funksionale, e pastaj të thuash se në komuna po bashkëpunojmë për nevojat e tyre. Sepse edhe në nivel kombëtar politika bëhet për të njëjtët qytetarë. Nuk bëhet për kunguj”!

Në disa komuna janë arritur tashmë marrëveshje mes subjekteve që synojnë të marrin nën udhëheqje komunat në raundin e dytë. Në disa raste janë arritur koalicione mes subjekteve që në muajt e fundit kanë refuzuar të bashkëpunojnë në nivelin qendror. Të martën, u zyrtarizua koalicioni VV-AAK në Prizren dhe Junik. Po ashtu është arritur ditë më parë edhe koalicioni PDK-LDK në Fushë-Kosovë. Ndërsa LDK-ja nuk e miratoi një marrëveshje të kandidatit të saj në Vushtrri me kandidatin e VV-së.

E të dielën, Lëvizja Vetëvendosje dhe Albin Kurti dështuan në formimin e qeverisë pasi nuk arritën asnjë marrëveshje me partitë tjera për të siguruar shumicën në kuvend. Partitë opozitare po ashtu kanë mohuar mundësinë e një koalicioni për të marrë mandatarin e dytë.

Balotazhi mbahet më 9 nëntor.