Kurti dhe instituti francez diskutojnë për mbrojtjen e Kosovës

Kryeministri në detyrë i Republikës së Kosovës, Albin Kurti, është takuar me institutin Jacques Delors, në kuadër të vizitës së tij zyrtare në Paris.

Në një diskutim të përbashkët, Kurti dhe përfaqësuesit e këtij instituti folën për rreziqet aktuale gjeopolitke dhe investimet në mbrojtje të Kosovës, shkruan IndeksOnline.

“Ishte kënaqësi të takohesha me Institutin Jacques Delors, një organizatë e nderuar me seli në Paris, e themeluar nga emri i saj, një nga arkitektët më të mëdhenj të BE-së, për një diskutim mbi gjeopolitikën dhe ndikimin e saj në Ballkanin Perëndimor. Shfrytëzova rastin për të theksuar nevojën për një qasje vendimtare dhe të bazuar në meritë ndaj zgjerimit nga BE-ja, si një çelës për sigurinë evropiane përballë rreziqeve aktuale gjeopolitike.

Diskutuam gjithashtu investimet në mbrojtje të Kosovës, mbrojtjen kushtetuese dhe praktike të të drejtave të njeriut dhe të pakicave, si dhe lidhjen e pandashme midis axhendave ekonomike dhe parimeve demokratike” u shpreh Kurti.

Kujtojmë se Kurti udhëtoi sot në drejtim të Francës, me ftesë të presidentit Emmanuel Macron, ku do të marrë pjesë në Forumin e Paqes.

Kurti sonte do të jetë po ashtu i ftuar në darkën e shtruar nga qarku diplomatik i Parisit./IndeksOnline/