11:50 / E Enjte, 02 Maj 2019 / indeksADMonline

Kurti: Më 2 maj të vitit 1999, çdo minut dikush vdiste në Studime të Vushtrrisë

Kryetari i Lëvizjes Vetëvendosje, Albin Kurti, ka kujtuar 20 vjetorin e masakrës së fshatit Studime të Vushtrrisë.

Kurti thotë se më 2 maj në këtë vend për 2 orë u vranë 116 shqiptarë, ku çdo minutë dikush vdiste.

Ai ka theksuar se kanë kaluar 20 vjet dhe ende nuk ka drejtësi për viktimat. Thotë se serbët nuk duhet paragjykuar por kriminelët duhen gjykuar.

Postimi i plotë i Kurtit

Bastisje, plaçkitje, ekzekutim. 116 shqiptarë vriten për dy orë. Çdo minut dikush vdiste në Studime të Vushtrrisë më 2 maj 1999. Burra e gra, pleq e fëmijë. Nga Azemine Vërsheci, 71 vjeçare, e Bejtë Ferizi, 84 vjeçar, deri te Mexhit S. Gërgjaliu, 11 vjeç.

Operacioni i madh “Patkoi” me të cilin Kosova po spastrohej nga shqiptarët, përbëhej nga shumë ‘patkojë’ të vegjël, e një i tillë ishte edhe ky në Vushtrri. Fshatrat viheshin nën rrethim, njerëzit dëboheshin nga shtëpitë e tyre, ua merrnin gjësendet me vlerë, sidomos paratë e kursimeve dhe arin e nuseve, dhe i drejtonin për Shqipëri, për t’ua prerë rrugën pas pak eskadronet policore dhe militare që i pushkatonin këta refugjatë.

20 vjet më vonë nuk ka drejtësi për viktimat, nuk ka dënim për kriminelët, nuk ka as prehje e kompensim për familjarët e mbetur, nuk ka as pendesë e kërkimfalje nga pushteti në Beograd ku mbeten të njëjtit.

Sigurisht që nuk duhet të ketë paragjykime për serbët, por sigurisht që duhet të ketë gjykime për kriminelët serbë. Që plagët e të mbijetuarve të shërohen, që brezit të ardhshëm të mos i bartet trauma, që ardhmëria të jetë e sigurt për të gjithë.