Kurti: Po demonstrojmë se është e mundur që vendi të drejtohet në mënyrë efektive dhe morale

Kampusi Inovativ i UBT-së, ka filluar të shtunën punimet e Konferencës Ndërkombëtare për Shkencë, Teknologji, Biznes dhe Inovacion, si dhe Konferencës për Lidership, raporton Ekonomia Online.

Të pranishme në këtë ngjarje ishin personalitet të larta shtetërore e po ashtu edhe profesor nga universiteti të ndryshme të botës.

Kryeministri i Kosovës, Albin Kurti, tha Kosova gjatë dy viteve me qeverisjen e tij ka bërë përparim të njohur ndërkombëtarisht në fushat e të drejtave të njeriut, demokracisë dhe sundimit të ligjit.

Ai ka folur edhe për cilësitë fundamentale të liderit që e definojnë një lider të mirë dhe të madh.

Dy cilësitë kryesore të një lideri të mirë, sipas kryeministrit, janë efektiviteti pragmatik për të tërhequr dhe mirëmbajtur ndjekës ose mbështetës, dhe përkushtimi parimor ndaj një kauze të drejtë, sepse pragmatizmi pa parime është bosh, kurse parimi pa pragmatizëm është i pafrytshëm. Ndërkaq, duke folur për cilësitë që e përcaktojnë një lider të madh, ai tha se ata definohen nga vullneti për të sakrifikuar interesin e tyre për një kauzë më të madhe. Pra, liderët e mëdhenj janë aq të dedikuar ndaj parimeve të tyre dhe aq të vendosur për t’i mbrojtur ato në mënyrën më të mirë, sa që janë të gatshëm të sakrifikojnë interesin e tyre personal.

“Për të dhënë një shembull se si duket lidershipi parimor në një shoqëri të lirë, demokratike. Në dy vjet e gjysmë në detyrën tonë të deritanishme, ne kemi bërë përparim të njohur ndërkombëtarisht në fushat e të drejtave të njeriut, demokracisë dhe sundimit të ligjit. Këtë vit, Freedom House e renditi Kosovën në vendin e tretë në mbarë botën për progresin demokratik nga viti në vit. Projekti Botëror i Drejtësisë e ka renditur Kosova të parën në Ballkanin Perëndimor për sundimin e ligjit dhe të dytin në botë për përmirësimin më të madh në fushën e sundimit të ligjit gjatë vitit 2022. Në Indeksin e Perceptimit të Korrupsionit të Transparency International, ne jemi përmirësuar për 20 vende në dy vitet e fundit. Ne jemi përmirësuar gjithashtu për 22 vende në Indeksin e Lirisë së Shtypit të Reporterëve pa Kufij dhe jemi renditur të parët në Ballkanin Perëndimor në Indeksin e Demokracisë Zgjedhore të Institutit VDM. Raporti i Komisionit Evropian për vitin 2022 konfirmon se Kosova ka rritur përpjekjet e saj për të luftuar korrupsionin dhe për të forcuar demokracinë dhe sundimin e ligjit. Me fjalë të tjera, tani më shumë se kurrë, ne po demonstrojmë se është e mundur të drejtohet vendi në mënyrë efektive dhe morale” tha ai.

Rektori i UBT-së, Edmond Hajrizi, tha se qëllimi i kësaj konferencë është që UBT-ja ta jep një pjesë të kontributit të saj në produktin shkencor, në produktin e inovacionit, në ndikimin në shoqëri, pasi sipas tij , kjo është përgjegjësia kryesore e institucioneve të arsimit të lartë.

Ai tha se UBT-ja është një nga 500 universitetet më të mira për zhvillim të qëndrueshëm në botë.

“Objektivi kryesor i konferencës është të krijojë një mjedis që lidhet me qasjen ndërdisiplinore dhe qasjen transdisiplinore. Ne donim të jepnim një pjesë të kontributit në produktin shkencor, në produktin e inovacionit, në ndikimin në shoqëri që siç e dini është përgjegjësia kryesore e institucioneve të arsimit të lartë. Jemi një nga 500 universitetet më të mira për zhvillim të qëndrueshëm në botë. Në renditja ne kemi arritur të jemi në 50 universitetet më të mira për revolucionin e katërt industrial, marrim çmimin më të mirë në ekselencë, kemi arritur të shpërblehemi këtë vit si një universitet sipërmarrës në Evropë si një universiteti i ri. Pra, ne po përpiqemi të jemi pjesë e zhvillimit dhe të tregojmë se kjo duke përdorur praktikën e mirë, duke rritur proaktivitetin dhe frymën e sipërmarrjes me një kornizë për inovacionin, ekosistemin mund të gjenerojë ndikime dhe të ecim përpara. Pra, ky ndikim na motivon shumë më tepër dhe ne do të punojmë së bashku, së bashku me 500 partnerë universitarë, së bashku me qeverinë, dhe të gjithë akteret në nivel kombëtar”, tha ai.

Në këtë konferencë një fjalim rasti e dha edhe profesori nga Universiteti i Harvardit, Hugh O’Doherty, ai përgëzoj Kosovën për atë që ka rritur deri tani.

“Dhe më lejoni t’ju përgëzoj për atë grup të mahnitshëm arritjesh nga ju dhe administrata juaj. Gama e asaj që keni arritur në një kohë kaq të shkurtër është vërtet e admirueshme”, tha ai.