Kurti takohet me Erdoganin: Diskutuam për të zgjeruar bashkëpunimin ekonomik dhe të mbrojtjes

Kryeministri i Kosovës, Albin Kurti, është pritur në takim nga presidenti i Turqisë, Recep Tayip Erdogan, të premten në Ankara.

Ndër të tjera Kurti, me anë të një postimi në rrjetin e tij social në platformën X, ka thënë se me Erdoganin ka diskutuar për mundësitë e reja për bashkëpunim ekonomik dhe në fushën e mbrojtjes.

“Diskutuam marrëdhëniet dypalëshe dhe mundësitë e reja për bashkëpunim ekonomik dhe të mbrojtjes. Të hënën do të mbahet forumi i parë ekonomik për bizneset nga Kosova dhe Turqia duke ofruar një shans për thellimin e lidhjeve dhe nxitjen e investimeve”, shkroi Kurti.

“Kryeministri Kurti shprehu mirënjohjen e tij dhe të popullit të Kosovës për mbështetjen e vazhdueshme të Turqisë përgjatë gjithë etapave të ndërtimit të shtetit të Kosovës dhe zhvillimit të tij, sikurse shprehu edhe falënderimin për përkrahjen e Turqisë për anëtarësimin e Kosovës në NATO dhe për votën e deputetëve turq në Asamblenë Parlamentare të Këshillit të Evropës më 16 prill të këtij viti dhe qëndrimin e Qeverisë së Turqisë në Komitetin e Ministrave të kësaj organizate”, thuhet në njoftimin në ZKM.

Vizita e Kurtit në Turqi është bërë në kuadër të Forumit Ekonomik të Bizneseve në mes Kosovës dhe Turqisë.

Today I was welcomed in Ankara by President @RTErdogan. We discussed bilateral relations & new opportunities for economic and defense cooperation. On Monday the first economic forum for businesses from 🇽🇰 and 🇹🇷 will be held, providing a chance to deepen ties & boost investments. pic.twitter.com/RYHvZh43Vv

— Albin Kurti (@albinkurti) May 31, 2024