Kushtrim Sheremeti jep dorëheqje nga pozita e drejtorit të Teatrit Kombëtar të Kosovës

Më 31 dhjetor 2025, Ministria e Kulturës, Rinisë dhe Sportit nxori tre vendime që ndryshuan udhëheqjen e Teatrit Kombëtar të Kosovës (TKK).

Komisioni Disiplinor pezulloi Kushtrim Sheremetin nga pozita e drejtorit të përgjithshëm, po të njëjtën gjë bëri edhe sekretari i përgjithshëm i ministrisë.

Në të njëjtën ditë, udhëheqësja teknike e TKK-së, Rrezarta Basha, u emërua ushtruese e detyrës së drejtorit.

Po atë ditë, Sheremeti dorëzoi zyrtarisht dorëheqjen, të cilën e kishte paralajmëruar katër ditë më parë.

Vendimi për pezullim u nxor pas kërkesës së Këshillit Drejtues të TKK-së për iniciimin e procedurës disiplinore ndaj Sheremetit, me argumentimin e keqmenaxhimit të institucionit.

Komisioni Disiplinor konstatoi se ekzistonte bazë për pezullim të përkohshëm deri në marrjen e vendimit përfundimtar. Në përgjigje të këtij procesi, Sheremeti dorëzoi letrën e dorëheqjes dhe njoftoi kolegët për vendimin e tij.

Sheremeti, i cili kishte nisur mandatin katërvjeçar në shkurt të vitit 2022, tha se vendimi për t’u tërhequr ishte personal dhe i mirë-menduar.