Ky është 11-vjeçari nga Ukraina që udhëtoi i vetëm 1200 km për një jetë më të sigurt

Një djalë ukrainas ka shkuar i sigurt në Sllovaki pasi udhëtoi rreth 1200 km nga Ukraina lindore, me dy çanta të vogla, një pasaportë dhe numrin e telefonit të të afërmve të tij.

11-vjeçari Hassan, la shtëpinë e tij në Zaporizhzhia sepse nëna e tij nuk mund të linte nënën e saj të moshuar, raporton BBC.

Ajo e hipi në një tren dhe kur arriti në kufi, 11-vjeçari u ndihmua nga doganierët, transmeton Indeksonline.

Zyrtarët thanë se ai ishte një hero i vërtetë dhe i kishte fituar të gjithë me buzëqeshjen e tij.

Ai u pranua nga vullnetarë të cilët i dhanë ushqim dhe pije ndërsa zyrtarët e kufirit ranë në kontakt me të afërmit në kryeqytetin sllovak, Bratislavë.

Nëna e tij, përmes një video të postuar nga policia sllovake, falënderoi të gjithë për kujdesin e djalit të saj.

“Pranë qytetit tim është një termocentral që rusët po bombardojnë. Unë nuk mund ta lija nënën time – ajo nuk mund të lëvizë vetë – kështu që dërgova djalin tim në Sllovaki”, tha Julia Pisecka./Indeksonline/