12:35 / E Enjte, 26 Mars 2020

Lajmërohet Albin Kurti, flet për herë të parë si kryeministër në detyrë

Kryeministri i në detyrë, Albin Kurti është deklaruar pas seancës së djeshme ku u votua mocioni për rrëzimin e qeverisë së udhëhequr nga ai.

Kurti tha se ishte kjo një rënie e domosdoshme për ngritjen e nevojshme. Sipas tij, pa rënë qeveria si përbërje nuk bëhet dot qeverisja si përmbajtje.

Kurti theksoi se mbledhja e djeshme e kuvendit do të ishte mirë të mbahej mend gjatë, por që nuk do të ndodhë kështu, transmeton Indeksonline.

Albin Kurti tha se e ardhmja është e tyre, ndërkohë që do ta humbin një tragjedi.

Kryeministri në detyrë tha se qëllimi i mosbesimit nuk ishte rrëzimi i qeverisë sa dobësimi i qeverisjes.

Postimi i plotë:

Ishte kjo një rënie e domosdoshme për ngritjen e nevojshme. Pa rënë qeveria si përbërje nuk bëhet dot qeverisja si përmbajtje. Jo se e kemi ditur, gjithsesi e morëm vesh.

Mbledhja e djeshme e kuvendit do të ishte mirë të mbahej mend gjatë. Mirëpo, nuk do të ndodhë kështu, sepse ne do të fitojmë. Pra, e ardhmja është e jona, ndërkohë që do ta humbim një tragjedi.

Ky kuvend nuk e beson këtë qeveri sepse i nënshtrohet qeverisë si të tillë. Qeveria jonë nuk e beson këtë kuvend sepse e dashuron kuvendin si të tillë.

Saktë e kishte thënë mbrëmë Prof. Enver Hasani: mosbesimi ishte koniuktural. Kur përfaqësimi demokratik bie në koniukturë politike, tjetërsimi bëhet normë.

Qëllimi i mosbesimit nuk ishte rrëzimi i qeverisë sa dobësimi i qeverisjes. Ndërkaq kuptimi i mosbesimit ishte porosia ambasadorit Grenell: në Kosovë janë mbi 80 deputetë të gatshëm të rrezikojnë edhe jetët e qytetarëve vetëm që të kalojë shkëmbimi presidencial.

Do të vazhdojmë si qeveri në detyrë. Jemi qeveri me detyra dhe jo qeveri e detyruar.

Para së gjithash, duhet ta luftojmë bashkë pandeminë Covid-19. Mbi të gjitha, le t’i rrimë popullit afër se Kosova është shtëpia jonë.