Lavrov: Putin ka urdhëruar përgatitjen e një prove me armë bërthamore

Ministri i Jashtëm rus, Sergej Lavrov, ka konfirmuar sot se Rusia ka filluar punën për zbatimin e urdhrit të Presidentit Vladimir Putin, i cili javën e kaluar kërkoi përgatitjen e propozimeve për një provë të mundshme me armë bërthamore.

Sipas agjencisë shtetërore të lajmeve TASS, Lavrov tha se udhëzimi i Putinit është marrë në shqyrtim dhe procesi për zbatimin e tij ka nisur.

“Sa i përket udhëzimit të Presidentit Vladimir Putin në takimin e Këshillit të Sigurimit më 5 nëntor, ai është pranuar për zbatim dhe ndërkohë po punohet për të. Publiku do të informohet për rezultatet,” deklaroi Lavrov.

Urdhri i Putinit vjen pas njoftimit të papritur të ish-presidentit amerikan Donald Trump, i cili javën e kaluar bëri të ditur se Shtetet e Bashkuara do të rifillojnë testet me armë bërthamore, për herë të parë pas më shumë se 30 vitesh.

Lavrov theksoi se Moska nuk ka marrë ende asnjë sqarim zyrtar nga Uashingtoni për këtë nismë.

“Rusia nuk ka marrë asnjë sqarim nga SHBA lidhur me urdhrin e Presidentit Donald Trump që ushtria amerikane të rifillojë testet bërthamore,” – tha ministri rus për TASS.

Në postimin e tij në platformën Truth Social, Trump kishte shkruar: “Për shkak të vendeve të tjera që testojnë programe armatimesh, unë kam udhëzuar Departamentin e Luftës që në mënyrë të barabartë të fillojë testimin e armëve tona bërthamore. Ky proces do të fillojë menjëherë.”

Tensionet mes dy fuqive bërthamore duket se po rikthehen në nivele të larta, duke ngritur shqetësime për një ringjallje të garës globale të armatimit bërthamor. /balkanweb