LDK, VV, AAK dhe AKR dalin me pesë konkluzione për dialogun në Bruksel (Dokument)

Në Mitrovicë, është mbajtur tryeza lidhur me dialogun që po zhvillohet në Bruksel midis Republikës së Kosovës dhe Republikës së Serbisë, të cilën e kishte ftuar kryetari i Komunës së Mitrovicës, Agim Bahtiri.

Në tryezë morën pjesë nënkryetari i parë i LDK-së, Agim Veliu, nënkryetari i parë i VV-së, Besnik Bislimi, nënkryetari i AAK-së, Ahmet Isufi dhe kryetari i Kuvendit të Përgjithshëm të AKR-së, Fatmir Matoshi.

Pas një diskutimi të gjerë e të frytshëm, ku qëndrimet lidhur me çështjet që u diskutuan ishin shumë të përafërta, pjesëmarrësit e Tryezës së rrumbullakët, lidhur me procesin e dialogut ndërmjet Republikës së Kosovës dhe Republikës së Serbisë, njëzëri miratuan këto

K   O   N   K   L   U   Z   I   O   N   E

-Në dialogun që po zhvillohet në Bruksel nuk mund  të ketë  negociata për ndryshim të kufijve të Republikës së Kosovës dhe as për shkëmbimin e territoreve midis dy shteteve.
-Asociacioni i Komunave të Kosovës me shumicë serbe nuk mund të formohet në kundërshtim me ligjet e Republikës së Kosovës dhe frymën e Kushtetutës sonë.
-Është i domosdoshëm shqyrtimi dhe vlerësimi i procesit të deritanishëm negociator, duke u bazuar në raportin e Qeverisë së Republikës së Kosovës, mbi arritjet dhe sfidat në zbatimin e Marrëveshjeve të Brukselit.
-Është e domosdoshme që Kuvendi i Republikës së  Kosovës të hartoj një Platformë  të përbashkët negociatore që përfshinë kërkesat e shtetit të Kosovës ndaj Serbisë dhe më pastaj të caktoj ekipin negociator.
-Ekipi negociator i aprovuar duhet t’i raportoj Kuvendit të  Republikës së Kosovës pas çdo raundi të bisedimeve në Bruksel.