Llazanski për takimin Pompeo-Vuçiq, takime të tilla tregojnë se pavarësia e Kosovës është e papërfunduar

Ambasadori aktual i Serbisë, Mirosllav Llazanski, takimin e sotshëm të presidentit serb, Aleksandar Vuçiq, me sekretarin amerikan të Shtetit, Mike Pompeo, e ka komentuar si shumë të rëndësishëm dhe se fakti se Amerika organizon këso takimesh dëshmon se ajo insiston për vazhdimin e dialogut Beograd-Prishtinë.

“Me faktin se Amerika insiston për takime të tilla vetëm tregon se pavarësisht se ambasadorët e Amerikës në Beograd e Prishtinë deklerativisht thonë se procesi i pavarësisë së Kosovës është punë e kryer, kjo tregon se megjithatë nuk ka përfunduar”, citojnë mediat e Beogradit deklaratën e Llazanskit dhënë RTS-së.

“Me vetë faktin se Amerika insiston që dialogu Beograd-Prishtinë të vazhdojë dhe fakti se Amerika organizon takime të tilla, kjo tregon se ka hapësirë për një lloj zgjidhjeje që do të ishte e pranueshme edhe për Beogradin”, është shprehur ai.