Lucas te Bayerni? Atletico Madrid del me komunikatë zyrtare

Ditën e djeshme u publikua një lajm i bujshëm në Spanjë, sipas të cilit mbrojtësi Lucas Hernandez në janar do të lërë Atletico Madridin për Bayernin.

Marca raportonte se klubi gjerman ka arritur marrëveshjen me kampionin e botës dhe do të paguajë në janar klauzolën e prishjes së kontratës, që është 85 milionë euro.

Megjithatë, duket se Atletico nuk do të lëshojë pe aq lehtë, sepse sot ka dalë me një deklaratë zyrtare për mediet, ku sqaron lajmin e djeshëm.

“Në lidhje me lajmin e publikuar nga Marca, rreth largimit të Lucas Hernandez drejt Bayernit, Atletico dëshiron të sqarojë se ka biseduar me futbollistin dhe Lucas ka mohuar çdo marrëveshje. Gjithashtu, lojtari na ka konfirmuar se dëshiron të qëndrojë në Madrid”, shkruhet në komunikatën e klubit madrilen.

“Duke marrë në konsideratë marrëdhëniet e shkëlqyera mes dy klubeve, edhe Bayern ka mohuar zyrtarisht një operacion të tillë, në një bisedë mes drejtuesve”.

Lucas Hernandez y el Bayern niegan la existencia de un acuerdo para el pago de su cláusula
➡ https://t.co/ZqreOUBBuH

— Atlético de Madrid (@Atleti) December 19, 2018

Në këtë mënyrë, i jepet përgjigja e parë Bayernit, që më siguri ka në mendje ndonjë plan B, ndoshta duke rritur ofertën, sepse mbrojtësi 22-vjeçar i Francës, i cili luan në të majtë dhe në qendër, nuk ka ndërmend të largohet me polemika.