Lushaku-Sadriu: Arsimi me Kurtin dorëzim dhe dështim
![](https://indeksonline.net/wp-content/uploads/2023/08/366256035_6659257427429584_203611670581475429_n.jpg)
Nënkryetarja e Komunës së Prishtinës Jehona Lushaku-Sadriu ka thënë se arsimi me kryeministrin Albin Kurti, është dështim dhe dorëzim.
Lushaku -Sadriu ka shkruar në Facebook se të pranosh dështimin është fillimi i përgjegjësisë dhe reflektimit. Por, të hedhësh barrën e keq-qeverisjes mbi supet e prindërve sipas saj, nuk është vetëm një akt i papranueshëm, por edhe një shfaqje e pastër e hipokrizisë.
“Sipas logjikës së Kryeministrit Kurti, trinomi i fajësisë për gjendjen e arsimit përfshin nxënësit, mësuesit dhe prindërit – por asnjëherë qeverisjen e tij të paaftë. Në tre vitet e tij në detyrë janë alokuar plot 370 milionë euro për arsimin. Përfundimi? As strategji, as vizion, e as zgjidhje konkrete për sfidat e përballuara”, ka shkruar Lushaku-Sadriu në Facebook.
Ndërsa ka thënë se premtimeve për ndërtimin e qindra çerdheve, u mungon realizimi pasi që as pesë nuk janë ndërtuar në tre vite.
“Bibliotekat e reja? Janë vetëm një ëndërr e parealizueshme. Nismat për të rritur cilësinë e arsimit mungojnë plotësisht. Rreth ndërlidhjes mes tregut të punës dhe arsimit pyes veten: për cilin treg pune flet kryeministri, kur të rinjtë e vendit po e braktisin Kosovën çdo ditë në kërkim të mundësive në Evropë? Në vitin e fundit të mandatit të tyre, askush nuk mund të pretendojë se arsimi ishte prioritet i një qeverie që dikur i etiketoi qytetarët si “analfabetë të fshehtë”. Zhvillimi i vërtetë arsimor kërkon më shumë se fjalë të bukura; kërkon përkushtim të vërtetë, përditë dhe transparent”, ka shkruar Lushaku-Sadriu në Facebook.