Macron thotë se Franca do ta rrisë numrin e kokave bërthamore

Presidenti francez, Emmanuel Macron, ka njoftuar se Franca do ta rrisë numrin e kokave të saj bërthamore për herë të parë pas dekadash, duke thënë se “për të qenë të lirë, duhet të na kenë frikën”, raporton “France24“.

Macron dha përditësimin mbi strategjinë bërthamore të vendit në një fjalim nga një bazë ushtarake që strehon nëndetëset balistike me raketa të vendit.

Macron tha se Franca po hynte në një fazë të re në strategjinë e saj të parandalimit bërthamor, e cila do të plotësonte misionin bërthamor të NATO-s, dhe ftoi aleatët evropianë të marrin pjesë në stërvitje të parandalimit bërthamor.

“Ajo që do të doja është që evropianët të rimarrin kontrollin e fatit të tyre” tha Macron.

Macron theksoi se fuqia bërthamore e vendit do të vihej në shërbim të paqes. Megjithatë, ai paralajmëroi për kapacitetin e vendit për të përdorur arsenalin e tij të konsiderueshëm bërthamor në një mënyrë “nga e cila asnjë vend, asnjë fuqi, sado e fortë, nuk do të mund të rimëkëmbej.”

Presidenti shtoi se Franca do të organizojë një samit në Paris më 10 mars për të nxitur zhvillimin e energjisë bërthamore dhe përdorimet e saj, duke pranuar se Franca është e pozicionuar mirë “për të promovuar energjinë bërthamore civile”.

Fjalimi synonte kryesisht të shpjegonte se si armët bërthamore franceze përshtaten në kuadrin më të gjerë të sigurisë së Evropës, në dritën e pyetjeve të reja të ngritura nga pushtimi rus i Ukrainës dhe tensioneve të përsëritura me presidentin amerikan Donald Trump lidhur me Ukrainën, Grenlandën dhe NATO-n.

Udhëheqësit evropianë kanë shprehur pasiguri në rritje mbi angazhimin e SHBA-së për të mbrojtur Evropën nën ombrellën e saj bërthamore, një politikë e menduar prej kohësh për të siguruar që aleatët, veçanërisht anëtarët e NATO-s,të mbroheshin nga forcat bërthamore amerikane në rast kërcënimi, pa zhvilluar kapacitete të tyre bërthamore.