Mashtroi FBI-në për rusët, Trump mendon të falë ish-këshilltarin

Presidenti amerikan, Donald Trump, synon ta shfrytëzojë mundësinë e faljes së ish-këshilltarit për Siguri Kombëtare, Micheal Flynn, i cili është deklaruar fajtor, më 2017 për gënjim të Byrosë Federale të Hetimeve (FBI) rreth kontakteve të tij me rusët, kanë raportuar mediat amerikane.

Trumpi u ka thënë ndihmësve të tij se planifikon të shtojë Flynnin në një seri të faljeve që do t’i bëjë publike pak ditë para përfundimit të mandatit, kanë raportuar mediat si “Axios”-i dhe “New York Times”-i, duke cituar burime të paidentifikuara.

Bisedimet sekrete të Flynnit me ambasadorin rus në Uashington në dhjetor të vitit 2016, kanë qenë pikë kyç e hetimeve për ndërhyrjen e Moskës në zgjedhjet presidenciale të vitit 2016 dhe rreth asaj nëse ka pasur koordinim në mes të fushatës së Trumpit dhe Qeverisë ruse në zgjedhje.

Trumpi pati shkarkuar Flynnin në shkurt të vitit 2017, mirëpo presidenti ka pretenduar se hetimet kanë qenë “gjueti shtrigash” politike dhe se Flynni është “burrë i mirë”.

Flynni, gjeneral ushtarak në pension dhe ish-udhëheqës i Agjencisë për Inteligjencë në Mbrojtje, është deklaruar fajtor dy herë se kishte gënjyer FBI-në për bisedat që ka pasur me ambasadorin rus në SHBA, gjatë transicionit presidencial në fund të vitit 2016 dhe të fillim të vitit pasues.

Mirëpo ai ka synuar të tërheqte deklaratën e tij, duke thënë se prokurorët i kanë shkelur të drejtat dhe e kanë shtyrë drejt një marrëveshjeje pranimi.

Përmes një veprimi befasues, në maj të këtij viti Departamenti amerikan i Drejtësisë ka tërhequr rastin kundër Flynnit, duke thënë se gënjeshtrat e supozuara drejt FBI-së, nuk kanë qenë të rëndësishme.

Mirëpo një gjyqtar federal që ka shqyrtuar rastin e Flynnit ka kërkuar hetim më të thellë gjyqësor lidhur me këtë çështje.

Një falje eventuale nga Trumpi do ta largonte këtë rast nga gjykatat.