Mbi 2 milionë fansa në koncertin falas të Shakirës në Copacabana

Këngëtarja kolumbiane Shakira ka shënuar një moment historik në karrierën e saj, duke mbledhur mbi 2 milionë fansa në një koncert madhështor falas në plazhin e famshëm Copacabana në Rio de Janeiro.

Ngjarja, e mbajtur më 2 maj 2026, konsiderohet një nga koncertet më të mëdha në botë, ndërsa ishte pjesë e turneut të saj “Las Mujeres Ya No Lloran”. Sipas autoriteteve lokale, ky është koncerti më i madh në karrierën e artistes dhe një nga më të ndjekurit në historinë e muzikës live, transmeton IndeksOnline.

Shakira elektrizoi turmën me hitet e saj më të njohura si “Hips Don’t Lie”, “Waka Waka” dhe këngë të tjera ikonike, duke krijuar një atmosferë festive në një nga plazhet më të njohura në botë.

Koncerti ishte falas për publikun dhe u organizua në kuadër të një iniciative të qytetit për të promovuar turizmin dhe aktivitetet kulturore ndërkombëtare. Eventi pati gjithashtu ndikim të madh ekonomik, duke gjeneruar qindra miliona dollarë për ekonominë lokale.

Në skenë iu bashkuan edhe artistë të njohur brazilianë, duke e bërë mbrëmjen edhe më të veçantë për miliona fansa që kishin udhëtuar nga vende të ndryshme për të qenë pjesë e spektaklit.

Ky koncert e konfirmon edhe një herë statusin e Shakirës si një nga artistet më të mëdha latine në botë dhe një ikonë globale e muzikës pop./IndeksOnline/