Me vendim të PZAP-it për anulim votash nga Serbia, LDK-së i hiqet një deputet mashkull

Pas ankesave të disa subjekteve politike, Paneli Zgjedhor për Ankesa dhe Parashtresa (PZAP) ka vendosur të bëjë anulimin e votave nga Serbia dhe njëherësh të rinumërohen 1472 vendvotime.

Ky vendim ka ngjallur pakënaqësi të shumta të dy partive të cilat dolën të parat në zgjedhjet e këtij viti, LDK-së dhe LVV-së.

Nga Lëvizja Vetëvendosje thuhet se tre deputetë të kësaj partie i janë drejtuar Gjykatës Supreme me ankesa lidhur me vendimin e PZAP-së.

E nga Lidhja Demokratike e Kosovës u dorëzua një ankesë, por që ende nuk dihet se nga kush u dorëzua kjo ankesë.

Deputetja e LDK-së, Valentina Bunjaku-Rexhepi, tha për Indeks Online, se ai që pëson nga vendimi i PZAP-së , lidhur me anulimin e votave nga Serbia si dhe rinumërimin e 1472 vendvotimeve, duhet të jetë mashkulli i cili ka marrë më së paku vota nga radhët e LDK-së.

 “Nuk e di, unë nuk kam dërgu ankesë në PZAP, kam pasë thirrje të shumta sot nga mediat, por matematikisht ai që bie nga lista e LDK-së, patjetër nëse na heqet një deputet, duhet të jetë mashkull”.

Sipas listës së LDK-së, deputeti mashkull me më së paku vota nga Lidhja Demokratike e Kosovës, është Driton Bislimi, i cili nga këto zgjedhje ka marrë 6889 vota./Indeksonline/