Mesazhet e Murselit me Kokallën dhe Plavën, provë se eliminimi i Liridonës ishte planifikuar për 29 nëntor

Prokuroria ka paraqitur sot prova të reja tronditëse në seancën gjyqësore ndaj Naim Murselit, Granit Plavës dhe Kushtrim Kokallës, duke theksuar se komunikimet ndërmjet të akuzuarve janë dëshmi e qartë se vrasja e Liridona Ademajt ishte planifikuar të ndodhte më 29 nëntor 2023.

Sipas prokurores së rastit, Javorka Perlinçeviq, mesazhet e ndërsjella, ekspertizat e telefonave dhe video-incizimet e asaj dite dëshmojnë për përgatitjet e hollësishme që i paraprinë krimit.

“Shumë është e rëndësishme të dëshmojë edhe Jeton Bunjaku, nga i cili Granit Plava ka huazuar veturën ‘Seat’, po ashtu edhe Valon Lokaj, dëshmi e rëndësishme, i cili në ditën kritike kur ka ndodhur rasti, të parin e ka thirrur Naim Murselin dhe i cili të akuzuarit ia ka siguruar qëndrimin. Më vonë aty është bashkuar edhe Kushtrim Kokalla,” ka deklaruar Perlinçeviq, transmeton IndeksOnline.

Prokuroria ka përshkruar me detaje itinerarin e të akuzuarve, duke përfshirë pamje të kamerave të sigurisë, vendndodhjet e telefonave dhe komunikimet direkte mes tyre.

“Në mungesë të akuzuarit Naim Murseli dhe të vrarës Liridona Ademaj, për të cilën Plava ka deklaruar se nuk i ka marrë, shihet biseda në mes të akuzuarit Kokalla dhe Plava. Në një pjesë shihen mesazhet që i ka pranuar Naim Murseli, të cilat e vërtetojnë që kjo vrasje është dashur të ndodhë po atë ditë,” ka shtuar prokurorja.

Procesi gjyqësor po vazhdon nën masa të larta sigurie, ndërsa dëshmitë e paraqitura sot pritet të kenë peshë të madhe në ecurinë e këtij rasti që ka tronditur opinionin publik. IndeksOnline do të vazhdojë t’ju mbajë të informuar për çdo zhvillim./IndeksOnline/