Mesazhet e zbuluara trondisin Sarah Ferguson, marrëdhënia e dyfishtë me Jeffrey Epstein vë në siklet familjen mbretërore

Emailet e dala në dritë së fundmi kanë zbuluar fytyrën e dyfishtë të Sarah Ferguson, Dukeshës së Jorkut, në marrëdhënien e saj me të ndjerin Jeffrey Epstein, duke shkaktuar trazira të forta në Britaninë e Madhe.

Ndërsa në mars të vitit 2011, ajo kishte deklaruar publikisht se “nuk do të kishte kurrë të bënte me” miliarderin amerikan, vetëm disa javë më vonë i kishte dërguar atij një mesazh personal, duke e quajtur një “mik të palëkundur, bujar dhe të shkëlqyer”.

Dukesha kishte qenë në qendër të kritikave kur u zbulua se kishte marrë 15,000 paund nga Epstein për të mbuluar borxhet ndaj ish-asistentit të saj – një marrëveshje që ishte rregulluar nga ish-bashkëshorti i saj, Princi Andrew.

Pas reagimeve publike, më 7 mars 2011, në një intervistë për Evening Standard, ajo e quajti këtë marrëveshje një “gabim monstruoz”, duke deklaruar: “Unë e refuzoj pedofilinë dhe çdo abuzim seksual të fëmijëve. Nuk do të kem më kurrë të bëj me Jeffrey Epstein.”

Megjithatë, më 26 prill 2011, në një email të ri, Ferguson i pranoi Epstein-it se ishte “detyruar” të distancohej prej tij për të mbrojtur karrierën e saj si autore librash për fëmijë dhe filantrope për fëmijë. Ajo kërkoi falje që “e la të ekspozuar” dhe theksoi se nuk e kishte quajtur kurrë pedofil, edhe pse deklaratat e saj ishin interpretuar ndryshe në media.

Në të njëjtin mesazh, Dukesha e përshkruan situatën si “makthin më të keq të jetës së saj”, duke akuzuar median se “e përdorte për ta lënduar”. Ajo shprehu gjithashtu frikën se aktivitetet e saj bamirëse mund të dështonin, duke kërkuar mirëkuptim:

“Isha e thyer dhe e humbur. Nuk doja ta lëndoja përsëri Andrewn.”

Zbulimet kanë shkaktuar reagime të ashpra edhe brenda familjes mbretërore, me analistët që parashikojnë presion në rritje që Pallati të distancohet përfundimisht nga Jorkët.

Autori Andrew Lowney i cilësoi emailet si “shkatërruese për besueshmërinë e saj”, duke shtuar: Ajo është me dy fytyra dhe dëmton reputacionin e saj si autore librash për fëmijë dhe mbrojtëse e bamirësive.

Nga ana e saj, një zëdhënës i Ferguson deklaroi se Dukesha “ishte kërcënuar me veprime ligjore nga Epstein pas denoncimit të tij publik”, dhe se emaili ishte dërguar pas këshillave ligjore me qëllim “qetësimin e situatës”.

Sarah Ferguson ka botuar më shumë se 50 libra për fëmijë dhe të rinj dhe mbetet aktive në fushën e bamirësisë përmes Sarah’s Trust, e cila deklaron se ka mbështetur 1.4 milion fëmijë në mbarë botën. Ajo vazhdon të jetë aktive në industrinë botuese me një seri të re librash, si dhe në nisma të ndryshme rinore.

Zbulimet e fundit vijnë në një moment kur ajo dhe Princi Andrew po rishfaqen në publik, duke provokuar reagime të forta. Rasti pritet të rrisë presionin mbi Pallatin Mbretëror për të marrë distancë të mëtejshme nga çifti York, ndërsa hija e Epstein vazhdon të rëndojë mbi monarkinë.