Michelle Obama me emision kuzhine për fëmijë në Netflix

Ish-Zonja e Parë e Shteteve të Bashkuara të Amerikës, Michelle Obama, do të nisë një emision kuzhine në “Netflix”, që i dedikohet publikut të ri në moshë.

Ajo do të jetë protagonistja dhe producentja ekzekutive e emisionit “Waffles+Mochi”, i cili do të nisë të shfaqet, më 16 mars.

Duke folur për emisionin e saj, Michelle ka sqaruar se përmbajtja do të jetë e përshtatshme për fëmijët.

Në emision do të shfaqen dy kukulla me emrat Waffles dhe Mochi, ndërsa ajo do të vijë si pronare e dyqanit dhe emisioni do të tregojë rrugëtimin e tyre në përpjekje për t’u bërë kuzhinierë.

Tema e emisionit është e lidhur me sloganin e Michelle, “Let’s move” (Të lëvizim) që ka shënuar fushatën e saj për shëndetin publik që ka pasur për qëllim luftimin e mbipeshës te fëmijët.

Ndryshe, siç transmeton CNN, Michelle dhe bashkëshorti i saj, ish-presidenti amerikan Barack Obama, kanë nënshkruar marrëveshje disavjeçare me “Netflix”-n për prodhimin e filmave dhe serialeve me emërtimin Higher Ground Productions.