Ministri i Financave, Punës dhe Transfereve Hekuran Murati zyrtarisht pranon detyrën

Ministri i Financave, Punës dhe Transfereve Hekuran Murati pranoi zyrtarisht detyrën e ministrit nga ministri në detyrë i Financave Agim Krasniqi. Gjatë pranimit të detyrës ministri Murati theksoi se është nder dhe përgjegjësi e madhe që të jesh ministër i një dikasteri shumë të rëndësishëm për shtetin e Kosovës, ku edhe na presin punë dhe obligime të mëdha dhe se jam i bindur që së bashku me stafin e kësaj ministrie do t’ia dalim të realizojmë programin e qeverisë “Kurti II”.  

Ministri Hekuran Murati e falënderoi ministrin në largim Agim Krasniqi për pritjen, punën dhe kontributin e dhënë deri tani dhe theksoi se ndihet më i sigurt në hapat në vazhdim pasi që në kuadër të MF-së gjithherë ka pasur dhe ka njerëz të përgatitur dhe të përgjegjshëm për punë.

Ai gjithashtu theksoi se duke pasur parasysh programin e Qeverisë, fuzionimin e dy ministrive në një si dhe implementimin e programit në luftën kundër pandemisë COVID-19, na presin punë të mëdha.

Ndërsa ministri në detyrë Agim Krasniqi e uroi ministrin e ri Hekuran Murati  për pozitën e re dhe theksoi se aktualisht kemi një siguri të madhe sa i përket gjendjes financiare të shtetit të Kosovës.